२०७४ माघ २१ गते २ नम्बर प्रदेशसभा पहिलो बैठक बसेपछि २०७६ माघमा २ वर्ष पूरा भएको छ । दोस्रो वर्षमा बसेका प्रदेश सभाका ५२ वटा बैठक बसेका छन् । बैठकमा शीर्ष नेताकै उपस्थिति न्यून देखिएको छ ।

प्रदेशसभा सचिवालयका अनुसार समाजवादी पार्टीको तर्फबाट सरकारको नेतृत्व गरिरहेको मुख्यमन्त्री लालबाबु राउत ५२ मध्ये १४ बैठकमा उपस्थित छन् ।

भूमि, व्यवस्था, कृषि तथा सहकारी मन्त्री शैलेन्द्रप्रसाद साह १३ दिन, आर्थिक मामिला तथा योजना मन्त्री विजयकुमार यादव २१ दिन उपस्थित भएका छन् ।

प्रदेश सरकारका मन्त्रीमध्ये सबैभन्दा बढी उपस्थिति प्रदेश सरकारका प्रवक्ता समेत रहेका आन्तरिक मामिला तथा कानून मन्त्री ज्ञानेन्द्रकुमार यादवको रहेको छ । उनी ४१ दिन बैठकमा उपस्थित भएका छन् ।

राजपा नेपालको तर्फबाट सरकारमा नेतृत्व गरिरहेको भौतिक पूर्वाधार विकास मन्त्री जितेन्द्रप्रसाद सोनार २४ दिन उपस्थित भएका छन् । उनी राजपा संसदीय दलका नेता हुन् । राजपाका अर्का मन्त्री सामाजिक विकास मन्त्री नवलकिशोर साह सुडी १९ दिन मात्र उपस्थित भएका छन् ।

उद्योग, पर्यटन, वन तथा वातावरण मन्त्री रामनरेश राय भने २३ दिन उपस्थित भएका छन् । राजपाका तर्फबाट राज्यमन्त्रीहरू अभिराम शर्मा १० दिन, सुरेशकुमार मण्डल १६ दिन र डिम्पलकुमारी झा १८ दिन मात्र उपस्थित भएका छन् ।

समाजवादी पार्टीको तर्फबाट प्रदेश सरकारका राज्यमन्त्री उषाकुमारी यादव २ दिन, सरोजसिंह कुशवाहा १६ दिन र योगेन्द्रराय यादव २७ दिन उपस्थित रहेका छन् ।

प्रदेश सभामा सबैभन्दा ठूलो दल तथा प्रमुख प्रतिपक्षी दल नेकपाका संसदीय दलका नेता सत्यनारायण मण्डल ३२ दिन, प्रमुख सचेतक सुन्दर बहादुर विश्वकर्मा ३१ दिन उपस्थित भएका छन् । नेपाली कांग्रेस संसदीय दलका नेता रामसरोज यादव ३४ दिन, प्रमुख सचेतक उपेन्द्रप्रसाद कुशवाहा ३६ दिन उपस्थित भएका छन् ।

समाजवादी पार्टीका प्रमुख सचेतक शैलेन्द्रकुमार यादव ३८ दिन, राजपाका प्रमुख सचेतक परमेश्वर साह सुडी ४५ दिन उपस्थित भएका छन् ।

प्रदेश सभाको दोस्रो वर्षमा २०७५ फागुन महिनामा १ वटा, चैत्रमा ३ वटा, २०७६ वैशाखमा ४ वटा, जेठमा १७ वटा, असारमा १० वटा, साउनमा ७ वटा, भदौमा ५ वटा, कात्तिकमा ३ वटा र पुसमा २ वटा गरी ५२ बैठक बसेका छन् ।

यस्तो छ उपस्थितिको विवरण –

प्रदेशसभा सचिवालयका सचिव रञ्जितकुमार यादवले उपलब्ध गराएको सांसदको उपस्थितिको सूचीअनुसार नेकपाका सांसद कुन्दनप्रसाद कुशवाहा सबैभन्दा कम उपस्थित भएका सांसद हुन् । उनी ५२ वटा बैठकमध्ये ९ वटा बैठकमा मात्र उपस्थित भएका छन् । राजपा नेपालका सांसद अभिराम शर्मा १० वटा बैठकमा उपस्थित भएका छन् । महोत्तरीबाट प्रत्यक्ष चुनाव जितेका शर्मा प्रदेश सरकारको सामाजिक विकास राज्य मन्त्री समेत हुन् ।

समाजवादी पार्टीका सांसद रामकिशोर प्रसाद यादव पनि ११ दिन मात्र उपस्थित भएका छन् । कम उपस्थित भएको सांसदको सूचीमा समाजवादी पार्टीका सांसद कौशलकुमार यादव पनि पर्छन् । उनी जम्मा १२ दिन मात्र संसदको बैठकमा उपस्थित भएका छन् ।

नेकपाका सांसद मोहम्मद समीर पनि १२ दिन मात्र उपस्थित भएका छन् । नेपाली कांग्रेसका धनलाल ठाकुर १४ दिन उपस्थित भएका छन् । 

सभामुख सरोजकुमार यादव ४६ दिन उपस्थित भएका छन् भने उपसभामुख उपमाकुमारी देव ४२ दिन उपस्थित भएका छन् । प्रायःजसो बैठकको सञ्चालन सभामुख यादव आफैंले गरेका छन् । सदन सञ्चालन गर्ने बेलामा सभामुख यादवले केही समय उपसभामुख देवलाई पनि बैठक सञ्चालन गर्ने मौका दिने गरेका छन् । सभामुख यादव अनुपस्थित भएको दिनमा भने उपसभामुख देवले नै बैठक सञ्चालन गर्ने गरेका छन् ।

प्रदेश सभामा १०७ जना सांसदहरू छन् । ८ जिल्ला समेटिएको प्रदेशमा ६४ जना प्रत्यक्ष र ४३ जना समानुपातिकतर्फ जितेर प्रतिनिधित्व गर्दै आएका छन् ।