विराटनगर, ७ जेठ– एक नम्बर प्रदेशसभा सदस्य लिला बल्लभ अधिकारीले आफ्नै नेतृत्वमा बनेको समितिले तयार पारेको नियमावलीको उल्लंघन गरेका छन् । 

साढे ३३ किलो सुन तस्करी र सनम शाक्य हत्या अभियोगमा पक्राउ परेकाहरुको पक्षमा वहस गर्दै अधिकारी आफ्नै नेतृत्वमा बनेको प्रदेश नम्बर १ को प्रदेश सभा नियमावली २०७४ को भावना बिपरित उभिएका हुन् । 
जिल्ला अदालत मोरङको इजलाशमा जारी थुनछेक वहसमा आइतवार प्रतिवादी नेपाल प्रहरीका निलम्बित सई बालकृष्ण सञ्जेलको पक्षमा अधिकारीले बहस गरे ।

बहुचर्चित सुन तस्करी र सनम शाक्य हत्या प्रकरणको सरकारवादी मुद्दामा सांसद समेत रहेका अधिकारीले प्रतिवादीको पक्षमा बहस परेपछि उनी विवादमा तानिएका हुन् । 

राज्य संचालनको ३ अंग कार्यपालिका, ब्यवस्थापिका र न्यायपालिका एक अर्काका लागि कानून कार्यान्वयन र बिधिको शासन सिकाउने संस्थाका रुपमा स्थापित निकाय हुन्   । सरकारवादी मुद्दामा  ब्यवस्थापिका संसदका सदस्य नै प्रतिवादीको पक्षमा बहसमा उत्रिनु अश्वभनिय र नैतिकता बाहिरको बिषय बनेको न्यायीक क्षेत्रका जानकारहरु बताउँछन्  । बहसका क्रममा उनले राम्रो काम गर्ने प्रहरीलाई फसाउन खोजिएको बताए । 

माथिल्लो निकायबाट आएको निर्देशन बमोजिम प्रहरी अधिकारी पक्राउ गर्न आउँदा सञ्जेललाई फसाइएको अधिकारीको जिकिर छ । 

प्रदेश नम्बर १ को  प्रदेश सभा बैठकमा केही दिन अघिको शून्य समयमा बोल्दै सांसदहरुले सुन तस्करी र हत्यामा संलग्नलाई पक्राउ गरी कडा कार्वाहीको माग राखेका थिए । तर त्यही संसदका एक जना सदस्य भने त्यही घटनासँग जोडिएका व्यक्तिको पक्षमा बहस गर्न झोला बोक्दै पुगे ।

कानून व्यवसायी अधिकारी प्रदेश सभा निर्वाचनमा एमाले–माओवादी गठबन्धनबाट मोरङ क्षेत्र नम्बर २ को प्रदेश ‘ख’बाट निर्वाचित भएका थिए । 

कानून ब्यवसायी अधिकारी कै नेतृत्वमा गठित समितिले प्रदेश सभा नियमावली तयार पारेको थियो । नियमावलीको नियम १७८ (ख) मा समाजमा विद्यमान सार्वजनिक नैतिकता र आचरण अनुकुलको ब्यवहार सदैब गर्ने लेखिएको छ ।सोही नियमावलीको नियम १८० मा आचरण अनुगमन समिति गठन गर्ने ब्यवस्था छ । तर प्रदेश सभाले आचरण अनुगमन समिति गठन गरेको छैन ।

अधिकारीले अदालतमा बहस गरेपछि समिति गठन गर्ने समेत नैतिक दवाव बढेको छ । अधिकारीले आफू  कुनै न्यायीक समितिमा नभएकोले बहस गर्न अप्ठेरो नपर्ने प्रतिक्रिया दिए ।  आइतवारसम्म ५४ जना प्रतिवादी तर्फका वकिलहरुले प्रतिरक्षा गर्दै बहस गरेका छन् ।