लमजुङ - सरकारले लमजुङ जिल्लामा आर्थिक वर्ष २०७४/७५ मा १ अर्ब ८  करोड २८  लाख रकम अनुदान रकम बितरण गरेको छ ।  लमजुङमा दुई सय २० भूकम्पपीडितले मात्र आवास निर्माणको तेस्रो किस्ता भुक्तानी लिएका छन् ।

आर्थिक वर्ष ०७४/७५ मा २ सय २० लाभग्राहीले तेस्रो किस्ताबापतको रकम लिएका हुन् ।

लमजुङमा भूकम्पपीडित लाभग्राहीको संख्या १३ हजार ९ सय ५९ छ ।

लाभग्राहीको संख्या ठूलो भए पनि अहिलेसम्म जम्मा दुई सय २० परिवारले मात्र भवन निर्माणको तेस्रो किस्ता रकम लिएका जिल्ला समन्वय समिति लमजुङका भूकम्पसम्बन्धी फोकल पर्सन शिव रेग्मीले जानकारी दिए । लमजुङमा ०७३/७४ मा पहिलो किस्ता लिने भूकम्पपीडितको संख्या ४ हजार २ सय ९५ थियो । आव ०७४/७५ मा पहिलो किस्ता लिने ८ हजार ८ सय ३६ थपिए ।

अहिलेसम्म १३ हजार १ सय ३१ जनाले पहिलो किस्ताबापतको ५० हजार रुपैयाँ लिएका छन् ।

दोस्रो किस्ता लिने लाभग्राहीको संख्या ४ हजार २४ रहेको रेग्मीले जानकारी दिए । ‘प्राविधिकहरूले ढिलो काम सुरु गर्नु, प्राविधिकको संख्या कम हुनु र दुर्गम क्षेत्रबाट प्राविधिक जाँच प्रतिवेदन आउन ढिला हुनुजस्ता कारणले पुनर्निर्माणमा ढिलाइ भएको हो,’ रेग्मीले भने ।

 लमजुङमा अझैँ ८ सय २८ लाभग्राहीले पहिलो किस्ता भुक्तानी लिन बाँकी छ । बसाइँ सरी गएका र आएका, जग्गा धनी पुर्जा नभएका , अन्यत्र घर भएका लाभग्राही परिवारले पहिलो किस्ताकै रकम नबुझेका हुन् । जिल्लामा दुई सय घर गैरसरकारी संस्था कोपाडेसले निर्माण गरेको छ ।

त्यस्तै, १ सय घर वेलफेयरको सहयोगमा निर्माण भएको छ । च्वाइस नेपालको सहयोगमा ५३ घर, आई एन एफ नेपाल ले २७  घर निर्माण गरिरहेको  पुनर्निर्माण प्राधिकरणले जनाएको छ । यसैगरी प्रबलिकरण लाभग्रहि ५३९  मध्य २९५  जनाको खातामा प्रथम किस्ता बापतको ५० हजार  अनुदान प्राप्त गरेका छन् ।

भुगोल र लाभग्रहि संख्या अनुसारको प्रबिधिक नहुदा पुन निर्माणले गति लिन नसकेको जिल्ला समन्वय समिति लमजुङका प्रमुख लोकराज पाण्डेले बताए ।