विराटनगर–आइतवार बिहान करिब ६ बज्नै लाग्दा मोरङको टंकीसिनवारी नजिकैबाट दुईवटा गाडी हुँकिँदै आउँदै थिए । एउटा स्कुल बस अर्को ट्रिपर । यी दुबै एकले अर्कोकोलाई कसरी हुन्छ उछिन्ने नै रणनीति बनाएको भान हुन्थ्यो ।

तीब्रगतिका दुबै गाडी कोभन्दा को कम भन्दै एकले अर्कोलाई उछिल्ने क्रममा कन्चनवारीको एबी पेट्रोल पम्प नजिकै आइपुग्दा ट्रिपरले स्कुल बसलाई ठक्कर दियो । त्यही को १ ख ५३०० नम्बरको ट्रिपर चालकले को १ क २७१० नम्बरको स्कुल बसलाई रोके । गाडीबाट ओर्लिएर बसका चालकलाई मुक्काले मुखमा हाने । 

यसरी हानेपछि विद्यार्थीहरु छक्क परे । अनि ति स्कुल बसका चालक बसबाट झरे र गाडीमा भएको रड निकाले अनि ट्रिपरका चालकलाई हातमा हाने । एकाएक स्थिती असामान्य बन्यो । बसका चालकले ट्रिपरको शिसा फुटाइ दिएपछि घटना थप उग्र बन्यो । 

त्यहाँका केही रमितेहरूले घटनालाई थप मलजल गरेर उकास्ने र लडाउने खालको भूमिका खेलेको पनि देखियो । ट्रिपरका चालकको दाहिने हातमा चोट लागेको प्रहरीले जनाएको छ । बसका चालकको मुखमा चोट लागेको छ । 
आक्रमक रुपमा मनपरी ट्रिपर चलाउने, दायाँबायाँका कुनै सवारीलाई साइड नदिने ट्रिपर चालकको प्रवृतीका कारण दुर्घटनाका घटनाहरु बढ्दै जान थालेको गुनासो पटकपटक आउने गरेको छ । आज बिहान भएको घटनाले पनि चालकहरुको अराजकताको कारण आफै अप्ठेरोमा परेको देखिएको पुष्टी गरेको छ । 

विराटनगरमा स्कुल बस र ट्रिपर गर्दा सामान्य अन्यले सास्ती खेप्नु परेको स्थानीयको गुनासो छ । बुढीगंगा गाउँपालिका नेमुवामा रहेको स्मृती बोर्डिङ स्कुलको गाडीमा विराटनगरमा रहेको कान्तिपुर कलेजका विद्यार्थी लिएर आएको बसलाई लक्षित गरी ट्रिपरले ठक्कर दिएको बताइन्छ । 

विराटनगरका स्कुल बसका चालकहरुले बस अत्याधिक गतिमा चलाउने गरेको पाइएको छ । पछिल्ला केही दिनमा स्कुल बस र ट्रिपरको ठक्करबाट धेरै घाइते भएका छन् भने कतिपयले ज्यानै गुमाएका छन्  । घटना न्यूनिकरणको लागि जिल्ला ट्राफिक प्रहरी कार्यालयले कन्जुस्याई गरेको स्थानीयको आरोप छ ।