काठमाडौं– ‘ए मेरो हजुर २’ बाट उदाएका नायक हुन् सलिनमान बनियाँ । उनि हाल आफ्नो दोस्रो चलचित्र ‘यात्राः अ म्युजिकल भ्लग’ को डबिङमा ब्यस्त छन् । 

डेब्यु चलचित्र मार्फत नै दर्शकमाझ नोटिस भएका सलिनमान दोस्रो चलचित्रमार्फत आफ्नो स्टारडम झनै बढाउने दाउमा छन् । प्रायः पब्लिक नहुने सलिनको फ्यान फलोइन पनि गज्जबकै छ । उनका गतिविधिमा फ्यानसँगै मिडियाकर्मीको पनि चासो हुने गर्छ । सलिनमान यात्रामा भ्लगरको भूमिकामा छन् । चलचित्र नयाँ वर्षको अवसर पारेर चैत्र २९ गतेबाट प्रदर्शनमा आउँदैछ । 

चलचित्रमा सलिनले गरेको डान्स र फाइटको चर्चा यतिबेला टिममा छ । ‘सलिन निकै मेहनती छन्, उनले आफुलाई बेस्ट देखाउन मेहनत गरेका छन्’ निर्देशक सम्राट शाक्यले भने । ‘हामीले चलचित्रमा यात्राको क्रममा आउने घटनाक्रमलाई देखाउने कोसिश गरेका छौ’ निर्देशक शाक्य भन्छन –‘सलिनको फ्यानले चाहे अनुरुप नै प्रस्तुत गरेका छौ ।’ चलचित्रको डबिङ गरिरहेका सलिन पनि खुसी देखिन्छन् । ‘हामीले सोँचेकै दृश्यलाई पर्दामा देखिरहेको छु’ सलिनले भने,–‘चलचित्रको लागि टिमले निकै मेहनत गरेका छौ ।’ उनले डबिङकै क्रममा चलचित्र पनि हेरिरहेका छन् । ‘रमाइलो भईरहेको छ’ सलिन भन्छन,–‘दोस्रो चलचित्रमा आइपुग्दा आफूलाई अझै परिपक्क बनाउँदैछु ।’ 
सलिनले ‘यात्रा’पछि अन्य चलचित्रको लागि साइन गरिसकेका छैनन् । उनि आफूलाई सुहाउँदो रोल अफर आओस् भन्ने चाहन्छन । चलचित्र यात्रामा सलिनसँगै, सलोन बस्नेत, जान्वी बस्नेत, जय नन्द लामा, रेअर राई, प्रेक्षा बज्राचार्य, धिरेन शाक्य, राजाराम  पौडेल लगायतको अभिनय छ । 

यसै चलचित्रमार्फत मल्लिका महतले डेब्यू गर्दैछिन् भने चलचित्रमा विदेशी कलाकारहरु चाइनाका जुन झाङ र केन्याका बबीको पनि अभिनय रहनेछ । चलचित्रमा बालकलाकारको रुपमा अंकित संग्रौला र एन्जल राई रहेका छन् ।

सम्राट शाक्यको कथा तथा निर्देशन रहने चलचित्रको प्रस्तुतकर्ता केशव भट्टराईसँगै चिज कुमार श्रेष्ठ हुन । बिक्रम पराजुली, मुक्ति तिम्सिना र राम शरण घिमिरे सह–निर्माता रहेका छन् । 

चलचित्रको निर्माता सुशील पोखरेल हुन् भने यसको कार्यकारी निर्माता सर्जुमान लिगल रहेका छन् । संजय लामाको छायाँकन रहेको चलचित्रमा कविराज गहतराज र प्रविन सिंहको कोरियोग्राफी, हिमाल केसीको द्वन्द, बनिश शाहको सम्पादन रहनेछ ।