काठमाडौं- प्रदीप खड्का र जसिता गुरुङ अभिनित चलचित्र ‘लभ स्टेशन’को पहिलो गीत सार्वजनिक गरिएको छ ।

प्रणय दिवस (भ्यालेन्टाइन डे)को अवसर पारेर बिहीबार ‘घाम जून चाहिदैन...’बोलको गीत सार्वजनिक गरिएको हो । भिडियोमा चलचित्रका मुख्य कलाकार प्रदीप र जसिता फिचर्ड छन् । भियतनाममा छायाँकन गरिएको रोमान्टिक गीतमा दुईको केमेष्ट्री गज्जबको देखिएको छ ।

यस गीतलाई सुगम पोखरेल र रेश्मा पुनले गाएका हुन् । जसमा दीपक शर्माको शब्द/संगीत छ ।

उज्ज्वल घिमिरे निर्देशित सांगीतिक प्रेमकथा बोल्न चलचित्रको निर्मातामा गोविन्द शाही, क्रिशु शाही र कविर विक्रम शाही रहेका छन् । चलचित्रमा प्रदीप र जसिताका अलवा रमेश बुढाथोकी, सिरु विष्ट, रवी डंगोल, प्रिया रिजाल, प्रकाश शाह, कालु राना, दिनेश काफ्ले लगायतको अभिनय छ ।

 चलचित्रभित्र ‘लभ स्टेशन’ विशेष ठाउँको नाम हुने जनाईएको छ । आलोक शुक्लाको छायाँकन रहेको चलचित्रमा शम्भुजीत बास्कोटा, दीपक शर्मा, राजनराज शिवाकोटी र एलिश कार्कीको संगीत छ । ‘लिलिबिली’ चलचित्रमा संगै काम गरेर लोकप्रिय बनेको प्रदीप र जसिताको जोडीको ‘लभ स्टेशन’ नयाँ वर्षको अवसर पारेर चैत २२ गतेबाट प्रदर्शनमा आउँदैछ ।