काठमाडौं – सर्वोच्च अदालतका न्यायाधीश दीपकराज जोशीले राजीनामा गरेका छन् । संसदीय सुनुवाइ विशेष समितिले जोशीलाई प्रधानन्यायाधीश बन्न अस्वीकृत गरेको थियो ।

न्यायाधीश जोशीले मंगलवार प्रधानन्यायाधीश चोलेन्द्र शमशेर राणामार्फत् राष्ट्रपति समक्ष राजीनामा बुझाएको सर्वोच्च स्रोतले लोकान्तरलाई जानकारी दियो । जोशीको कार्यकाल आगामी जेठसम्मलाई थियो ।

संविधानको धारा १३१ मा न्यायाधीशको पद रिक्त हुने अवस्थाबारे उल्लेख छ । प्रधानन्यायाधीश तथा न्यायाधीशले राष्ट्रपतिसमक्ष लिखित राजीनामा दिएमा पद रिक्त हुने संवैधानिक प्रावधान छ । 

राणा प्रधानन्यायाधीश भएपछि जोशी भूमिकाविहीन बनेका थिए । संसदीय सुनुवाइ विशेष समितिले अस्वीकृत गरेका जोशी अदालत गएको भन्दै सुनुवाइ समितिका सदस्यहरूले प्रश्न उठाएका थिए ।