काठमाडौं – भौतिक पूर्वाधार तथा यातायात मन्त्रलयले एक वर्षको उपलब्धि सार्वजनिक गरेको छ । मंगलवार मन्त्रालयमा पत्रकार सम्मलेन गर्दै मन्त्रालयले रघुवीर महासेठले जिम्मेवारी सम्हालेपछिको एक वर्षको उपलिब्ध सार्वजनिक गरेको हो ।

सार्वजनिक निर्माणको क्षेत्र तथा ठेक्का व्यवस्थापनमा उल्लेखनीय सुधार भएको भौतिक पूर्वाधार तथा यातायात मन्त्रालयको दाबी छ । एक वर्षको अवधिमा ९४ वटा पुल निर्माणको काम सम्पन्न भएको जानकारी गराउँदै मन्त्रालयले सार्वजनिक निर्माणको क्षेत्र तथा ठेक्का व्यवस्थापनमा उल्लेखनीय सुधार भएको जिकिर गरेको छ ।

महासेठले मन्त्रालयको जिम्मेवारी सम्हालेपछि ९४ वटा पुल निर्माणको काम सम्पन्न भएको मन्त्रालयले जानकारी दिएको छ । चालु आर्थिक वर्षमा १ सय वटा पुल निर्माणको लक्ष्य भएपनि २ सय वटा पुल निर्माण हुने गरी कार्य भइरहेको मन्त्रालयको प्रगति विवरणमा उल्लेख गरिएको छ ।

दूधकोशी नदीमा १ सय २० मिटर लामो मोटरेवल झोलुङ्गे पुल निर्माणको काम सम्पन्न भएको मन्त्रालयको भौतिक प्रगतिमा उल्लेख गरिएको छ । मन्त्रालयले महेन्द्र राजमार्गमा २ सय २५ मिटर लामो रातुखोला पुल निर्माणको काम ठेक्का सम्झौताभन्दा १८ महिना अगावै सम्पन्न भएको जानकारी दिएको छ ।

४ सय मिटर लामो मरिन खोल पुल र ५ सय मिटर लामो कमला पुल ठेक्का सम्झौताभन्दा १५ महिनाअघि नै सम्पन्न भएको तथा सम्झौता भन्दा एकवर्ष अघि नै सम्पन्न भएको भेरी नदी पुलको काम नै मन्त्रालयको प्रगति देखाउन प्रसस्त रहेको मन्त्रालयको दाबी छ ।

मन्त्री महासेठले आफूले मन्त्रालयको जिम्मेवारी सम्हालेपछि केही कठिनाइका बीच पनि मन्त्रालयले उल्लेखनीय कार्य गरेको दाबी गरे । उनले संघीयता कार्यान्वयनको पहिलो वर्ष तीनै तहका सरकारबीचको कार्य बाँडफाँड र कर्मचारी व्यवस्थापन लगायतका चुनौतीकाबीच मन्त्रालयले उल्लेखनीय काम गर्न सफल भएको मन्त्रीको जिकिर थियो ।

‘संघीयता कार्यान्वयनको पहिलो वर्ष कर्मचारी व्यवस्थापन, कार्यालय व्यवस्थापनमै गयो’ उनले भने, ‘सरकारका तीनै तहबीचको कार्य स्पष्ट नहुँदा स्थानीय तह र प्रदेश तहमा गएको बजेट समेत फिर्ता आउने स्थिति आयो ।’

मन्त्री महासेठले एकात्मक प्रणालीमा जस्तो काम गर्न सजिलो संघीय प्रणालीमा नभएको बताए ।

एकात्मक प्रणालीमा जस्तो काम गर्न सजिलो भएपनि चालू आर्थिक वर्षको लक्ष्य अनुसार काम सम्पन्न भएको मन्त्री महासेठको भनाइ थियो ।