विदेशी पर्यटकलाई लक्षित गर्दै एनसेलले ल्यायो ‘ट्राभलर्स सिम’

बैशाख ३१, २०७६

काठमाडौंं- नेपाल भ्रमणमा आउने पर्यटकले अब एनसेलको ‘ट्राभलर्स सिम’मार्फत आकर्षक भ्वाइस तथा डेटा बण्डलिङ सेवाको फाइदा लिन पाउने एनसेलले जनाएको छ । 

एनसेल प्रालि ले आजदेखि (वैशाख ३१ गते) देखि लागू हुने गरी ‘ट्राभलर्स सिम’ योजना ल्याएको छ । यसअन्तर्गत, नेपाल भ्रमणमा आउने विदेशीले मात्र ११० रुपैयाँ (करसहित) मा सजिलै ट्राभलर्स सिमको स्टार्टर प्याक खरीद गर्न सक्नेछन् । यसका साथै पर्यटकले आफ्नो आवश्यकता तथा नेपालमा रहने अवधिअनुसार विभिन्न भोल्युमका कम्बो प्याकहरूबाट फाइदा लिन सक्ने कम्पनीको भनाइ छ ।


ADVERTISEMENT

स्टार्टर प्याकको खरीदमा पर्यटकले ट्राभलर्स सिमसहित ३० रुपैयाँको मेन ब्यालेन्स र तीन दिनको लागि मान्य हुने ३०० एमबी डेटा प्राप्त गर्नेछन् । यसरी प्राप्त हुने मेन ब्यालेन्स एनसेल नेटर्वक भित्र कुरा गर्न प्रयोग गर्न सकिनेछ । 

‘ट्राभलर्स सिम’अन्तर्गत स्टार्टर प्याक सुचारु भएपछि पर्यटकहरूले आफ्नो आवश्यकताअनुसार ४९० देखि १,९६० रुपैयाँ सम्मका विभिन्न समयसीमा रहेका भ्वाइस तथा डेटा बण्डलिङ गरिएको कम्बो प्याकहरू खरीद गर्न सक्नेछन् ।

यो योजनामा अन्तर्गत कम्बो प्याकमा लाइट, मिडियम, हेभी र सुपर गरी चार वटा विकल्पहरू रहेका छन् । 

पर्यटकले ७ जीबी डेटा र २० मिनेट अन नेट टक टाइम रहेको लाइट प्याक करसहित मात्र ४९० रुपैयाँमा सुचारू गर्न सक्नेछन् । यो प्याक सुचारू गरेको दिनदेखि ७ दिनसम्म मान्य हुनेछ ।

अलि लामो समयको लागि नेपाल भ्रमणमा आउने पर्यटकले मिडियम तथा हेभी प्याक लिन सक्नेछन् । मिडियम प्याकअन्तर्गत ग्राहकले करसहित ९८० रुपैयाँ मा १४ जीबी डेटा तथा ३० मिनेट अन नेट टक टाइम प्राप्त गर्नेछन् र यो १४ दिनको लागि लागू हुनेछ । त्यस्तै हेभी प्याकअन्तर्गत करसहित १,४७० रुपैयाँमा २१ जीबी डेटा र ४० मिनेट अन नेट टक टाइम पाइने छ । यो २१ दिनको लागि मान्य रहनेछ । 

नेपाल भ्रमणमा रहेको बेला भ्वाइस तथा डेटा भोलुम बढी चाहिने ग्राहकले कर सहित मात्र १,९६० रुपैयाँमा सुपर प्याक सुचारू गर्न सक्नेछन् । यो प्याकअन्तर्गत ग्राहकले २८ दिन समयसीमा रहेको २८ जीबी डेटा र ५० मिनेट अन नेट टक टाइम पाउनेछन् । 

‘ट्राभलर्स सिम’ योजनाको कम्बो प्याकग्राहकले *१७१०५#  डायल गरी प्राप्त निर्देशनअनुसार सुचारू गर्न सक्नेछन् ।

विश्वका विभिन्न देशबाट नेपाल भ्रमणमा आउने पर्यटकका लागि भ्वाइस र डेटा सेवा बण्डल गरी ‘ट्राभलर्स सिम’ योजना सञ्चालनमा ल्याउन पाएकोमा कम्पनी हर्षित रहेको एनसेलले जनाएको छ ।

यो योजनाले नेपाल भ्रमणमा रहने विदेशीको सञ्चार सेवाको आवश्यकतालाई सहज रूपमा सुलभ दरका साथ सम्बोधन गर्ने पनि एनसेलले विश्वास लिएको छ । 

शुरूमा यो सिम एनसेलको त्रिभुवन अन्तर्राष्ट्रिय विमानस्थलमा रहेको एनसेल काउन्टर र देशका विभिन्न भागमा रहेका एनसेल सेन्टरहरूमा उपलब्ध हुनेछ र पछि बिस्तारै एनसेलका सबै प्वाइन्ट अफ सेल्सहरूबाट पनि लिन सकिने कम्पनीले जानकारी दिएको छ । 

यो सिम लिनका लागि पर्यटकले आफ्नो एक थान पासपोर्ट साइज फोटो र पासपोर्टको फोटोकपी बुझाउनु पर्छ । 
 

बैशाख ३१, २०७६ मा प्रकाशित

प्रतिक्रिया दिनुहोस