माओवादी पुस्तकहरू राखेको आरोपमा प्राध्यापकको घरमा छापा

भदौ २५, २०७६

काठमाडौं – भारतको नोयडास्थित सेक्टर ७८ को हाइड पार्क सोसायटीमा मंगलवार बिहान प्राध्यापक हनी बाबुको घरमा छापा मारिएको छ । सी ब्लक भवनको २१औं तल्लाको एउटा फ्ल्याटमा बस्ने दिल्ली विश्वविद्यालयका प्राध्यापकको घरमा छापा मारिएको हो ।

पुणेको एलगार परिषद्का तर्फबाट उत्तेजक भाषण दिएको विषय उठाएर छापा मारिएको थियो । 


ADVERTISEMENT

बिहान ६ः३० बाट शुरू गरिएको अनुसन्धान लगातार ६ घन्टा चलेको थियो । पुणे प्रहरीका केही अधिकारी बर्दीमा थिए भने केही चाहिँ सिभिल ड्रेसमा थिए । 

प्रहरीका अनुुसार, यो सर्च यान्ड सीज अपरेसन थियो र यो एलगार परिषदमाथिको अनुसन्धान अन्तर्गत गरिएको थियो । यस मुद्दामा प्रहरीले प्राज्ञिक जगतका मानिस र अभियन्ताहरूलाई माओवादीसँग सम्पर्क बनाएको आरोपमा पक्राउ गरेको छ । 

अनुसन्धान अधिकारी तथा पुणे प्रहरीका एसीपी शिवाजी पवारले मंगलवार कसैलाई पक्राउ नगरिएको बताए । उनले भने, ‘हामीले बाबुको घरमा खोजतलास गर्‍यौं ।’

दिल्ली विश्वविद्यालयको नर्थ क्याम्पसका अंग्रेजीका प्राध्यापकका रूपमा १० वर्षदेखि काम गरिरहेका ४५ वर्षीय हनी बाबुले आफूसँग भएका किताब र विद्युतीय सामग्रीमा २० जना प्रहरीले चासो देखाएको बताए । 

बाबुले प्रहरी कारवाहीका विषयमा प्रश्न उठाउँदै भने, ‘पुणे प्रहरीले मेरो किताबमा निकै चासो दियो । मैले माओवादी सम्बन्धी किताब राख्दैमा म आतंकवादी भएँ र ?’

प्रहरीले बाबुको घरबाट हार्ड डिस्क बरामद गरेको र त्यसको फरेन्सिक जाँच गर्ने बताए । 

सन् २०१७ को डिसेम्बर ३१ मा पुणेमा आयोजित भीमा कोरेगाँव जुलूसमा हिंसा भड्किएको थियो । उक्त जुलूसमा नक्सलीहरूको पनि सहभागिता रहेको अनि प्राज्ञिक जगतका मानिसले पनि नक्सली हिंसाको समर्थन गरेको प्रहरीको भनाइ छ ।

एजेन्सी
 

भदौ २५, २०७६ मा प्रकाशित

प्रतिक्रिया दिनुहोस