हवाई क्षेत्रको नियामक निकाय नेपाल नागरिक उड्डयन प्राधिकरणलाई नियामक र सेवा प्रदायक बनाउन दुई छुट्टाछुट्टै निकाय बनाउने दुई विधेयक आजको संसदको कार्यसूचीमा परेको छ । 

बुधवार दिउँसो १ बजे बस्ने प्रतिनिधि सभा बैठकमा पर्यटन मन्त्री प्रेमबहादुर आलेले दुई वटा विधेयकमाथि विचार गरियोस् भन्ने प्रस्ताव पेश गर्ने भएका छन् ।

‘नेपाल नागरिक उड्डयन प्राधिकरण विधेयक २०७६’ र ‘नेपाल हवाई सेवा प्राधिकरण विधेयक २०७६’ माथि विचार गरियोस् भन्ने प्रस्ताव मन्त्री आलेले प्रस्तुत गर्नेछन् । उक्त प्रस्तावमाथि छलफल भएर पारित भएपछि प्राधिकरणलाई नियामक र सेवा प्रदायक गरी दुई अलग निकाय बनाइने छ ।

ऐन आएपछि प्राधिकरणले आवश्यक तयारी गरेर दुई वटा निकाय सञ्चालनको तयारी गर्नेछ । युरोपेली  युनियन (ईयू)ले नेपालको हवाई उड्डयनलाई सुरक्षा सूची (कालोसूची)मा हालसम्म राखिरहनुलाई पनि यो विधेयक पारित भएपछि हटाउने अनुमान गरिएको छ । हाल उड्डयन प्राधिकरणले दुवै निकायको जिम्मेवारी लिइरहेको छ ।

अन्तर्राष्ट्रिय नागरिक उड्डयन संगठन (आइकाओ)ले समेत २०१४ भित्र प्राधिकरणलाई दुई निकायमा विभाजन गरिसक्नुपर्ने भनेको भए पनि अझै उक्त कार्य पूरा भएको छैन । यो विधेयक पारित भएपछि ईयूलाई नेपालको हवाई क्षेत्रलाई कालोसूचीबाट हटाउने अपेक्षा पनि गरिएको छ ।