छोराले सेन्चुरी प्रहार गरेपछि सचिनले भने– हरेक बुबा आफ्नो सन्तानबाट चिनाउन चाहन्छन्

भारतीय कीर्तिमानी क्रिकेटर सचिन तेन्दुलकरका छोरा अर्जुनले आफ्नो डेब्यु खेलमै सतक प्रहार गरेका छन् । गोवाविरुद्ध रणजी डेब्यु खेल खेल्दा पहिलो इनिङ्समा १२० रन बनाएर आफ्ना पिता सचिनसँगको कीर्तिमान बराबर गरेका थिए । सचिनले पनि सन् १९८८ मा रणजी डेब्यु खेलमा शतक बनाएका थिए । अब छोराको यो सफलतामा ‘मास्टर ब्लास्टर’को बयान आएको छ । उनले यो आफ्नो लागि ‘गौरवको विषय’ भएको बताए । 

सचिनले एक टेलिभिजन अन्तरवार्तामा आफ्नो डेब्यु शतक र बुबा रमेश तेन्दुलकरसँग जोडिएको एउटा किस्सा सुनाउँदै भने, ‘मलाई अझै पनि याद छ जब मेरो क्रिकेटको शुरुका दिनहरूमा मेरो बुबालाई कसैले ‘सचिनको पिता’ भनेर बोलाएको थियो । त्यसपछि मेरो बुवाको साथीले सोधे तिमीलाई कस्तो लाग्छ ? उनले भनेका थिए कि यो मेरो जीवनको सबैभन्दा गर्वको क्षण हो । हरेक बुबा आफ्नो बच्चाको कामबाट चिनिन चाहन्छन् ।’

क्रिकेटरको छोरा हुँदा दबाब

अन्तर्वार्तामा सचिनले क्रिकेटरको छोरा हुँदा थप दबाब महसुस हुने बताएका छन् । उनले यसअघि पनि अर्जुनलाई आफूसँग तुलना नगर्न आग्रह गरेका थिए । ‘उसलाई थप दबाब नदिनुहोस् । मेरा आमाबाबुले मलाई कहिल्यै दबाब दिनुभएन’, सचिनले भनेका थिए । खेलअघि सञ्चारमाध्यमले छोरा अर्जुनका बारेमा प्रश्न गर्दा ‘पहिले प्रदर्शन गर्न दिनुहोस्, उनको प्रदर्शनपछि मात्रै केही भन्नु उचित हुनेछ’ भनेका थिए । 

सतक बनाउनुअघि अर्जुन र सचिनबीच कुराकानी 

सचिनले डेब्यु म्याचको पहिलो दिन छोरासँग कुरा भएको खुलासा गरेका छन् । ‘मैले उनलाई शतकका लागि खेल्न भनेँ । उनी पहिलो दिनको अन्त्यसम्म ४ रनमा अपराजित रहे । उनले टोलीको लागि कति राम्रो स्कोर हुनेछ भनेर सोधेका थिए’, सचिनले भने, ‘पहिलो दिन टस हारेर ब्याटिङ गरेको गोवाले ५ विकेट गुमाएर २१० रन बनाएको थियो । मैले उसलाई भने कि कम्तिमा ३७५ अंक राम्रो हुनेछ । तब अर्जुनले भने कि पक्का भन्न सकिन्छ ? त्यसपछि मैले हो भनेँ, तिमी गएर सय बनाउनुपर्छ । त्यसपछि उसले मलाई सोध्यो के तपाईं गएर शतक बनाउन सक्नुहुन्छ भन्ने विश्वास गर्नुहुन्छ ?’

अर्जुनले बनाए १२० रन

गोवाका लागि अर्जुनले पहिलो इनिङ्समा २०७ बल सामना गर्दै १२० रन बनाएका थिए । उनले आफ्नो इनिङ्समा १६ चौका र २ छक्का प्रहार गरेका थिए ।