भगवान् रामको जन्मभूमि भारतको अयोध्यामा मूर्ति बनाउनका लागि नेपालबाट लगिएका शालिग्राम शिलाको भव्य स्वागत गरिएको छ ।

गण्डकी प्रदेशको कालीगण्डकी नदीबाट संकलन गरेर अयोध्या पुर्‍याइएका शिलालाई ५१ वैदिक ब्राह्मणले पूजन गरेका छन् ।

अयोध्यामा वर्षाैंदेखि राम मन्दिरको मुद्दा रहेको छ । हिन्दू धर्मावलम्बीको आस्था जोडिएको विषयले सार्थकता पाउँदा अयोध्यामा खुशीयाली छाएको छ ।

नेपालबाट लगिएको ६ करोड वर्ष पुरानो शिला रहेको विश्वास गरिएको शालिग्रामबाट रामसीताका मूर्ति बनाइनेछन् । ती मूर्तिलाई मन्दिरको मुख्य भागमा राखिने भारतीय सञ्चारमाध्यमले जनाएका छन् ।

पूर्व उपप्रधानमन्त्री विमलेन्द्र निधि र जानकी मन्दिरका महन्थ तपेश्वर दासले अयोध्या मन्दिरमा शिला हस्तान्तरण गरेका छन् । नेपालबाट ३७३ किलोमिटर यात्रा तय गरेर ७ दिनमा शालिग्रामलाई अयोध्या पुर्‍याइएको छ । रामसीताको मूर्ति बनाउन ४० शिलाको पहिचान गरिएको भए पनि अन्तिममा २ शिला छनोट गरिएको थियो ।

सरयू नदीको पुलमा पुष्पवर्षा गरेर शिलालाई स्वागत गरिएको छ । स्वागत समारोहमा भारतभरका चर्चित सन्तमहन्थहरूले सहभागिता जनाएका छन् ।

रामजन्मभूमि तीर्थक्षेत्र ट्रस्टका महामन्त्री चम्पत रायले कुन किसिमको मूर्ति बनाउने भनेर विचार भइरहेको बताए । यसका लागि देशभरका मूर्तिकारलाई अयोध्या बोलाइएको उनले बताए ।