नेपाली कांग्रेसका सांसद रामहरि खतिवडाले पशुपतिनाथ मन्दिरमा राखिएको सुनको जलहरीमा पूर्वराष्ट्रपति, पूर्वप्रधानमन्त्री, पूर्वमन्त्रीहरूको नाम लेखिनुको कारण पत्ता लगाउन आवश्यक रहेको बताएका छन् ।

सोमवार संसद् भवनबाहिर सञ्चारकर्मीहरूसँगको कुराकानी खतिवडाले यस्तो बताएका हुन् । खतिवडाले भने, ‘हामीले कसैलाई पनि मिथ्या आरोप लगाएर राजनीति गर्दैनौं । हामीलाई झूटको राजनीति गर्नु छैन । तर, त्योभन्दा ठूलो कुरा पूर्वराष्ट्रपति, पूर्वप्रधानमन्त्री र पूर्वसंस्कृतिमन्त्रीको नामबाट आएको पानी खानुपर्ने रहेछ, यो बाध्यता किन पारियो ?’

खतिवडाले यस विषयमा पनि सत्यतथ्य छानबिन हुनुपर्ने माग गरे ।

‘महादेवलाई उहाँहरूको नामबाट पानी खुवाउने चलन, पशुपतिनाथलाई खुवाउने चलन किन चलेछ ? यसमा छलफल गर्नुपर्छ । (सरकारले) सत्यतथ्य ल्याओस् ।’