बोल माया
एक वचन बोल
तिम्रै बोली
छ मलाई अनमोल !

५ वर्षअघि सार्वजनिक ‘बोल माया’ गीतलाई स्रोता एवं दर्शकले निकै रुचाए । गीतको चर्चासँगै गायिका शान्तिश्री परियारको व्यस्तता थप बढ्यो ।

‘त्यसअघि बामे सरिरहेकी म त्यसपछि उभिएर हिँड्न सकें,’ उनी भन्छिन्, ‘त्यो गीत सार्वजनिक भएपछि दैनिक ६ वटासम्म गीत गाएकी छु । स्टेजतिरको व्यस्तता पनि निकै बढेको छ ।’ 

बोल माया गीतले छुट्टै उचाइ दिलाएको उनी बताउँछिन् । त्यसपछि सार्वजनिक अर्को गीत ‘गलबन्दी’ पनि निकै चल्यो । एकपछि अर्को, अर्कोपछि अर्को । शान्तिश्रीले सांगीतिक क्षेत्रमा सफलता पाउँदै गइन् । स्रोता–दर्शकको माया बढाउँदै गइन् । 

हिट गीतकी धनी गायिका

शान्तिश्री हिट गीतकी धनी गायिका हुन् । ‘बोल माया’ र ‘गलबन्दी’ हुन्, चाहे ‘चौका दाउ’, ‘घर कता हो बैनीको’, ‘जाम भो माइली’ जस्ता गीतहरू हुन् । ‘खोली तारी देऊ न माझी दाइ’, ‘घुमीघुमी’ होस्, चाहे ‘आगो बिना बिडी’, ‘काउली’ जस्ता गीतहरू हुन् । यीबाहेक पनि उनका थुप्रै गीतहरू छन्, जुन करोड क्लबमा छन् ।

हिजोको कठोर संघर्ष

शान्तिश्रीको अहिलेको सफलतासँग धेरै जानकार छन् । उनको चर्चा र व्यस्तता सर्वाधिक छ । अहिलेकी नम्बर वान लोक दोहोरी गायिकाको रूपमा समेत उनलाई सम्बोधन गर्ने गरिएको छ तर आजको सफलता उनले निकै दुःखले आर्जेकी हुन् । 

अहिले धेरैको मन–मनमा बसेकी सुरिलो स्वरकी धनी यी गायिकाको विगत निकै दुःखद् थियो । 

शान्तिश्रीको जन्म रोल्पाको विकट गाउँ ह्वामामा, निम्न वर्गीय परिवारमा भएको हो । बुवाआमा, ४ दाजुभाइ, ३ दिदीबहिनी गरेर ९ जनाको परिवार । बुवाले सदरमुकाम लिवाङमा ज्यामी काम गरेर परिवार पाल्दै आएका थिए । 

शान्तिश्री ७ वर्षकी हुँदा परिवार सदरमुकाम लिवाङ झर्‍यो । सदरमुकाममा डेराको बसाइ । अभावहरू थपिँदै थिए । शान्तिश्री बाल्यकालमै हुँदा बिहान घरको काम सिध्याएर विद्यालय जाने गर्थिन् । 

विद्यालयमा पढ्न थालेपछि उनले आफूमा भएको प्रतिभा प्रस्फुटन गर्ने वातावरण पाइन् । २ कक्षामा पढ्दा बाल दिवसको दिन विद्यालयमा गायन प्रतियोगितामा भाग लिएर प्रथम भएको शान्तिश्री सम्झिन्छिन् । १३ वर्षको उमेरमै उनी दाङ पुगेर क्षेत्रीयस्तरको दोहोरी प्रतियोगितामा भाग लिएर तृतीय भएकी थिइन् । सानै उमेरदेखि गायनमा रुचि राख्ने बताउँदै त्यसबेला राष्ट्रिय स्तरका कलाकारहरूलाई प्रत्यक्ष देख्ने मौका पाएपछि गायिका बन्नुपर्छ भन्ने चाहना झन् चुलिएर गएको उनी सम्झन्छिन् तर उनलाई कहाँ सहज थियो र ! बुवा बिरामी परेपछि उपचारका लागि बुवाआमा काठमाडौं आए । दाइ, दिदीको विवाह भइसकेको थियो, भाइबहिनीको हेरचाहको जिम्मेवारी अब शान्तिश्रीको काँधमा आइलाग्यो ।

‘आफैंले कमाएर भाइबहिनीलाई हेर्नुपर्ने अवस्था आयो । त्यसपछि बाध्यतावश विद्यालय छाडें,’ उनले सम्झिइन्, ‘गिट्टी कुट्ने, बोक्ने काम गर्न थालें ।’

काठमाडौंमा उपचार गरेर बुवाआमा फर्किए । त्यसपछि कमाउनका लागि बुवा भारत गए । शान्तिश्रीलाई गायिका बन्ने सपना पूरा गर्न काठमाडौं जानुपर्छ भन्ने हुटहुटीले सताइरहेको थियो तर कसरी आउने मेलोमेसो मिलिरहेको थिएन । उनी आमाको सहारा पनि त थिइन् । 

आमालाई फकाएर जिल्लाकै प्रकाश जिसी नाम गरेका दाइमार्फत आफू २०६४ सालमा काठमाडौं आएको शान्तिश्रीले बताइन् । परिवारबाट कहिल्यै नछुट्टिएकी उनले काठमाडौं आएपछि एक्लोपन भोगिन् । दुःख र कष्ट झेलिन् । यद्यपि आफ्नो रहरका खातिर यी सब अवस्थालाई झेल्दै अगाडि बढिन् । शान्तिश्रीले शुरूआतमा बालाजु चोकमा रहेको त्रिवेणी त्रिशूली दोहोरी साँझमा काम गरिन् । त्यसपछि बागबजारमा रहेको रमाइलो चौतारी दोहोरी साँझमा पुगेर गीत गाइन् । क्रमशः अन्य दोहोरी साँझमा पनि गीत गाइन् । 

... अनि भयो पहिलो गीत रेकर्डिङ

दोहोरी साँझमा त गाइरहेकी थिइन् । केही पैसा पनि कमाइरहेकी थिइन् । यद्यपि गीत रेकर्ड गराउने सपना थियो । टेलिभिजनमा आफ्नो गीत आओस् भन्ने चाहना थियो । गायिका बनेर नाम कमाउने सपना थियो । 

२०६८ सालमा पहिलो गीत रेकर्डिङ गरिन् । शम्भु थापाको गीत थियो ‘अरूभन्दा फरक म किन ?’ यो गीतले चर्चा खासै पाएन । त्यसपछि आफ्नै लगानीमा ‘घर छ तीनतले’ बोलको गीत ल्याइन् । यो गीतको चर्चा पनि सोचेजस्तो भएन । त्यसपछि पृथ्वी थकालीले शान्तिश्रीको प्रतिभा देखेर केही लगानी गरिदिने भए । कुलेन्द्र विश्वकर्मा र शान्तिश्रीको आवाजमा सार्वजनिक भयो ‘एकतर्फी माया’ । ‘यो गीतले एक किसिमको चर्चा पायो । त्यसपछि मेरो सांगीतिक करिअर शुरू भयो भनौं । रेकर्डिङको अफरहरू आउन थाले,’ शान्तिश्री सम्झिन्छिन् ।

त्यहीबेला पृथ्वी थकालीले लगाएको गुन पनि उनले जीवनभर बिर्सन नसक्ने बताउँछिन् । थोरै पैसा आफैं जम्मा गरिन्, केही समयका लागि पृथ्वी थकालीसँग पैसा सापटी मागिन् ।

आफ्नै लगानीमा मिलन लामासँग मिलेर ‘गाईलाई दाम्लो, माछीलाई फुर्लुङ्ग’ गाइन् । उनको सांगीतिक करिअरको अर्को खुट्किलो बन्यो यो गीत । त्यसपछि विदेशबाट समेत कार्यक्रमका लागि अवसर आउन थाल्यो । 

उनले पहिलो कार्यक्रम ओमनमा गरिन् । दोस्रो कार्यक्रम हङकङमा गरिन् । त्यसपछि क्रमशः विभिन्न देशमा पुगेर स्टेज कार्यक्रममा सांगीतिक प्रस्तुति दिइन् । गायक पशुपति शर्मासँगको गीत ‘सातो फुक झाँक्री बा’ रुचाइयो ।

तीज गीत ‘बुहारी सुत्केरी भैछ’ पनि चल्यो । ‘मेरो छोरा दुई नम्बरी’ लगायतका गीत पनि रुचाइयो । ‘स्टुडियो मात्र नभएर स्टेजमा समेत व्यस्त बन्न थालेकी थिएँ । त्यसपछि २०७२ सालमा दोहोरी साँझ छाडेकी हुँ,’ शान्तिश्रीले बताइन् । त्यसपछि त हिट गीतहरूले उनलाई पछ्याइरह्यो ।

‘राम्रो–राम्रो टीमसँग काम गर्न पाइरहेकी छु, खुशी छु’

पछिल्लो समय गीत निर्माण केही घटेको कलाकारहरू बताउँछन् । शान्तिश्रीको सन्दर्भमा भने त्यो देखिँदैन । गत जेठमा उनले ४३ वटा गीत रेकर्ड गराएकी छन् । उनले अग्रजदेखि नयाँ पुस्ताका राम्रो–राम्रो टीमसँग सांगीतिक सहकार्य गरिरहेकी छिन् । गायक प्रकाश सपूतसँगको सहकार्य रहेका गीतहरू सर्वाधिक चर्चित छन् । गायक सुजन चापागाईंदेखि प्रकाश दूतराजसम्मका नयाँ पुस्ताका रुचाइएका कलाकारसँग उनले गीत गाएकी छन् । हिट गीत ‘बन्दिपुरैमा’मा उनी र अग्रज लोकगायक प्रेमराजा महतको स्वर छ । ‘आगो बिना बिडी’ शान्तिश्रीको स्वर रहेको हिट फिल्मी गीत हो । वरिष्ठ कलाकार हरिवंश आचार्यसँग शान्तिश्रीले २ वटा गीतमा स्वर दिइसकेकी छन् । जसमध्ये ‘काउली’ बोलको गीतलाई स्रोता दर्शकले रुचाएका छन् भने अर्को गीत सार्वजनिकको तयारीमा छ ।

‘अहिले राम्रो–राम्रो टीमसँग काम गर्न पाइरहेकी छु । एकदमै खुशी छु,’ उनी भन्छिन् । गायक समीर आचार्यसँग पनि सांगीतिक सहकार्यको तयारी रहेको उनले बताइन् । यतिबेला तीज गीतको रेकर्डिङमा व्यस्त छिन् उनी । अहिल्यैदेखि विदेशमा तीज विशेष कार्यक्रमका लागि बूक भइसकेकी छन् । 

अस्ट्रेलियामा १२ वटा तीज विशेष कार्यक्रम तय गरिसकेकी छन् । अस्ट्रेलियाबाट उनी भारतको दिल्ली पुगेर तीज विशेष कार्यक्रममा प्रस्तुत हुनेछिन् । ‘दिल्लीबाट इजरायल, इजरायलबाट दुबई अनि बल्ल नेपाल आउनेछु । यसपटक झण्डै १ महिना विदेशकै तीज विशेष कार्यक्रममा व्यस्त हुने भएकी छु,’ उनले तीजको व्यस्तता सुनाइन् ।