नवलपुर जिल्ला अदालतले एक वर्षमा ८२.३७ प्रतिशत मुद्दा फर्स्यौट गरेको छ । आर्थिक वर्ष ०७९/८० मा कूल २३१४ वटा मुद्दामध्ये १९०६ वटा मुद्दा फर्स्यौट भएको जिल्ला अदालतल नवलपुरले जनाएको छ । आर्थिक वर्ष ०७८/०७९ मा बाँकी रहेका ११३५ वटा मुद्दा र ०७९/०८० मा नयाँ दर्ता भएका ११७९ वटा मुद्दामध्ये १९०६ वटा मुद्दा फर्स्यौट गरिएको हो । 

दुई वटा इजलास भएको नवलपुर जिल्ला अदालतमा जिल्ला न्यायधीश उमेश प्रसाद लुइँटेल (इजलास नं १) बाट ७३९ थान र जिल्ला न्यायाधीश यज्ञप्रसाद आचार्य (इजलास नं २) बाट ११३५ थान फर्स्यौट भएका हुन् । 

त्यसैगरी सरूवा भई गएका जिल्ला न्यायाधीशहरू अर्जुन अधिकारी र नन्दकिशोर यादवबाट ३२ थान मुद्दाहरू फैसला भएका छन् ।
चुनावलगायत थप जिम्मेवारीको कारण इजलास नं १ बाट तुलनात्मक रूपमा केही मुद्दाहरू कम फर्स्यौट भएको अदालतले जनाएको छ ।

कार्यसम्पादनमा पनि उत्कृष्ट नवलपुर जिल्ला अदालतले आर्थिक वर्ष  ०७९/८० को असार मसान्तसम्म २ वर्ष नाघेका मुद्दाको संख्या शुन्यमा झारेको छ भने १८ महिना नाघेका मुद्दाहरूको संख्या केवल ७ वटा मात्रै रहेको छ। वार्षिक लक्ष्यको आधारमा फर्स्यौट दर १०९.४८ प्रतिशत रहेको छ ।

फैसला कार्यान्वयनमा पनि लक्ष्य भन्दा बढीको उपलब्धी हासिल भएको अदालतले जनाएको छ । यो नवलपुर जिल्ला अदालत स्थापना भए (वि. स. २०७४) यताकै सबैभन्दा बढी हो ।

आर्थिक वर्ष २०७९/०८० मा देशभर लगत कायम भएका मुद्दामध्ये ५०.३६ प्रतिशत मुद्दामात्रै फर्स्यौट भएका छन् ।  आर्थिक वर्षमा कूल १ लाख ८१ हजार ९०८ मुद्दाको लगत कायम भएकोमा १ लाख ६४ हजार ३६ मुद्दा अर्थात् ५०.३६ प्रतिशत मुद्दा फर्स्यौट भएका हुन् ।

१ लाख ६१ हजार ६६६ मुद्दा फर्स्यौट हुन बाँकी रहेको सर्वोच्च अदालतको आर्थिक २०७८/०७९ को वार्षिक प्रतिवेदनमा उल्लेख छ । 

प्रतिवेदनमा उल्लेख भएअनुसार सर्वोच्च अदालतमा मात्र कायम ३७ हजार १६९ थान मुद्दामध्ये १९ प्रतिशत मात्र फर्स्यौट भएका छन् । ७ हजार ६५ थान मुद्दा फर्स्यौट भएकोमा ३० हजार १०४ थान मुद्दा फर्स्यौंट हुन बाँकी रहेको प्रतिवेदनमा उल्लेख छ ।