२ नम्बर प्रदेशमा आज मतदान

जनकपुरधाम, २ असोज— तेस्रो चरणको स्थानीय तह निर्वाचन सोमबार (आज) हुँदैछ । निर्वाचन आयोगले प्रदेश नम्बर २ का ८ जिल्लाका १३६ वटा स्थानीय तहमा बिहान ७ देखि अपराह्न ५ बजेसम्म मतदान हुने जनाएको छ ।
आयोगले आइतबारै पत्रकार सम्मेलन गरेर मतदान कार्य सञ्चालन गर्नका लागि सम्पूर्ण तयारी पूरा भइसकेको जानकारी दिँदै ढुक्क भएर मतदान गर्न आममतदातालाई आग्रह गरेको थियो ।

आयोगले भनेको छ— बिहान ७ बजेदेखि अपरान्ह ५ बजेसम्म मतदान केन्द्रमा प्रवेश गर्नुभएका मतदाताले मात्रै मतदान गर्न पाउनु हुने हुँदा  सबै मतदाताले एक दिन राष्ट्रका लागि समय प्रदान गरी मतदानमा सरिक भई आफूले रोजेको योग्य उम्मेदवारलाई निर्वाचित गराउन अनुरोध गर्दछौं।


प्रदेश नम्बर दुईमा १ महानगरपालिका, ३ उपमहानगरपालिका, ७३ नगरपालिका र ५९ गाउँपालिका गरी १३६ वटा स्थानीय रहेका छन् भने यो निर्वाचनबाट ६ हजार ६२७ जना प्रतिनिधिहरु निर्वाचित हुने छन् ।

खाद्यान्नको उर्बरभूमि मधेसमा हालै गएको भीषण बाढी, डुबान र कटानले यस क्षेत्रका अधिकांश बासिन्दा कष्टकर जीवन बिताउन बाध्य हुनुपरेको अवस्थामा आज हुन लागेको निर्वाचनबाट निर्वाचित जनप्रतिनिधिहरुले जनताको सेवालाई नै सर्वोपरि राखेर काम गर्ने छन् भन्ने विश्वास लिइएको आयोगले जनाएको छ ।

गाउँपालिकाको अध्यक्ष, उपाध्यक्ष, नगरपालिकाको प्रमुख, उपप्रमुख र वडा अध्यक्ष, वडा सदस्य, महिला वडा सदस्य र दलित महिला वडा सदस्य पदका लागि मतदान हुन लागेको हो । यो ऐतिहासिक निर्वाचनले स्थानीय तहको नेतृत्व गर्ने व्यवस्थापिका, कार्यपालिका र न्यायापालिकाका जनप्रतिनिधिहरूको निर्वाचन गर्ने छ ।
गत बैशाख ३१ र असार १४ मा भएको पहिलो र दोस्रो चरणको स्थानीय तहको निर्वाचनमा मतदाताहरूमा ठूलो उत्साह देखिएको र तेस्रो चरणमा पनि यस्तै उत्साह रहने आयोगले विश्वास लिएको छ ।
मतदानका लागि मतदाताहरु मतदान परिचयपत्र लिएर मतदान केन्द्र जानुपर्ने हुन्छ । तर मतदाताले कारणवशः मतदाता परिचयपत्र प्राप्त गर्न नसकेमा वा प्राप्त गरेका मतदाताले परिचयपत्र हराएमा वा नष्ट भएमा उसको मताधिकार सुनिश्चित गर्न आयोगले वैकल्पिक व्यवस्थासमेत गरेको छ । जसअनुसार नेपाली नागरिकताको प्रमाणपत्र वा २०७० सालमा निर्वाचन आयोगबाट जारी गरिएको मतदाता परिचयपत्र वा राहदानी वा सवारीचालक अनुमतिपत्र वा जग्गाधनी प्रमाणपत्र वा सरकारी निकायबाट फोटोसहित जारी भएको अन्य परिचयपत्रसमेतका आधारमा मतदान गर्न पाउने व्यवस्था गरिएको निर्वाचन आयोगका प्रवक्ता नवराज ढकालले जानकारी दिए ।
आयोगले अपाङ्गता भएका, गर्भवती, सुत्केरी, ज्येष्ठ नागरिक, असक्त वा विरामी मतदातालाई सहज रुपमा मतदान गर्ने व्यवस्था समेत मिलाएको छ । यस्तै दृष्टिविहीन वा शारीरिक अशक्तता भएका मतदाताले आफैं मत सङ्केत गर्न नसकेमा एकाघरको परिवारका सदस्यले मतदान अधिकृतको स्वीकृति लिएर वा मतदान अधिकृतको सहयोगमा मतसङ्केत गर्न सक्नेछन् ।
तेस्रो चरणको निर्वाचनमा कुल ३७ हजार २३६ उम्मेदवार प्रतिस्पर्धामा छन् । तीमध्ये महिला १४ हजार ३३७ (३९ प्रतिशत) र पुरुष २२ हजार ८६१ (६१ प्रतिशत) को उम्मेदवारी रहेको छ ।
निर्वाचनमा यसअघि नै ८ जना उम्मेदवार निर्विरोध निर्वाचित भइसकेका छन् । नगरप्रमुख तथा अध्यक्षमा पुरुष एक हजार ७०९ र महिला ६१ जनाको उम्मेदवारी परेको छ ।
नगरउपप्रमुख वा उपाध्यक्षमा भने पुरुषको भन्दा महिलाको उम्मेदवारी सबैभन्दा बढी देखिएको छ । नगरउपप्रमुख र उपाध्यक्षमा १९७ जना पुरुष र ९१९ जना महिला उम्मेदवार छन् । वडाध्यक्षमा पुरुष ८ हजार ५२ जना र महिला २२३ जना उम्मेदवारहरू निर्वाचनको मैदानमा छन् । निर्वाचन सम्पन्न गराउन दुई हजार १६६ मतदान स्थलमा तीन हजार ५७८ मतदान केन्द्र रहने छन् भने मतदान कार्यमा सुरक्षाकर्मीबाहेक ३१ हजार ५०० जना कर्मचारी परिचालन गरिएको आयोजले जनाएको छ ।
यसैबीच दुई नम्बर प्रदेशका कतिपय जिल्लाका मतदान केन्द्रहरुमा ७ बजेभन्दा अघिदेखि नै मतदाताहरु उत्साहका साथ मत खसाल्न लाइनमा बसेको खबरहरु प्राप्त भएको छ ।

---

---