किन भयो चलचित्र ‘दिमाग खराब’को प्रदर्शन रोक्ने निर्णय ?

नेपाली चलचित्र ‘दिमाग खराब’को प्रदर्शन रोक्ने निर्णय भएको छ । निर्माण रौनक विक्रम कँडेल र निर्देशक निश्चल बस्नेतले बुधवार एक विज्ञप्ति जारी गर्दै प्रदर्शकहरूबाट अन्यायपूर्ण व्यवहार भएकाले चलचित्र प्रदर्शन रोक्न निर्णय भएको जानकारी दिएका हुन् । 

‘विदेशी चलचित्रलाई विना तर्क प्रशस्तै सोहरू दिने र दर्शकको अत्यधिक चासो भएको र दर्शकहरूले हेर्न खोजेका नेपाली चलचित्रलाई पनि आवश्यक शो नदिने प्रचलन पुरानै हो’, विज्ञप्तिमा भनिएको छ, ‘पहिलो र दोस्रो हप्ता निर्माता र हल सञ्चालकमा हुने शेयर बाँडफाँड ५०– ५० प्रतिशत हुन्छ । तर तेस्रो हप्तादेखि निर्मातालाई ३५ प्रतिशत र प्रदर्शकलाई ६५ प्रतिशत शेयर बाँडिने कुरा पनि हामीले जाहेर गर्दछौँ । र, यो अन्यायपूर्ण व्यवहार निरन्तर जारी रहेको हुनाले हामीले प्रतिवाद गर्ने निर्णय गरेका छौँ।’

आफूहरुले चाहेको समान व्यवहार भएको भन्दै विज्ञप्तिमा जबसम्म विदेशी चलचित्र र नेपाली चलचित्रलाई बराबर शो प्रदान गरिँदैन र फिल्म प्रदर्शन भइरहुन्जेल बराबरी शेयर बाँडफाँट हुँदैन तबसम्मका लागि नेपालमा चलचित्र प्रदर्शन रोक्ने निर्णय गरिएको उल्लेख गरिएको छ । 

‘समान व्यवहार भए सिनेमा हलमै प्रदर्शन गर्नेछौँ । नभए अरू कुनै माध्यमबाट हाम्रो सिनेमा दिमाग खराब दर्शकहरूलाई देखाउने छौँ भन्ने प्रतिबद्धता पनि व्यक्त गर्दछौँ’, विज्ञप्तिमा भनिएको छ । 

उक्त फिल्म कात्तिक २४ देखि प्रदर्शनमा आएको थियो ।