चर्चित अभिनेता प्रदीप खड्काले रेस्टुरेन्ट व्यवसाय सुरु गरेका छन् । उनले काठमाडौंको गैरीधारामा ‘प्याराडाइज गार्डेन रेस्टुरेन्ट एण्ड इभेन्ट’ सुरु गरेका हुन् । नीलसरस्वती मार्गमा रहेको यो रेस्टुरेन्टमा आइतबार साँझ ‘न्यू इयर इभ’ कार्यक्रम समेत गरिएको छ । 

उक्त अवसरमा अभिनेता प्रदीपले त्यहाँ पुगेकाहरूसँग प्रत्यक्ष साक्षात्कार समेत गरेका छन् । 

अब, फिल्मसँगै व्यवसायलाई पनि संगसंगै अगाडि बढाउने प्रदीपको योजना छ । सोही योजनाले उनी रेस्टुरेन्ट व्यवसायमा जोडिएका हुन् । २ करोडमाथिको लागतमा खुलेको रेस्टुरेन्टमा उनका केही पार्टनर पनि छन् ।

अभिनयको कुरा गर्दा प्रदीप ‘प्रेम गीत ३’पछि कुनै फिल्ममा देखिएका छैनन् । त्यसअघि उनको ‘प्रकाश’ फिल्म प्रदर्शनमा आएको थियो । अहिले भने प्रदीपको हातमा थुप्रै फिल्म छन् । उनी ‘पूजार सार्की’को छायांकनका निस्किने तयारीमा छन् भने ‘एरी’ र ‘एक्टर’ लगायतका फिल्ममा पनि उनले काम गर्दैछन् । 

पछिल्लो समय अन्य कलाकारहरू पनि व्यवसायतर्फ जोडिएका छन् ।