सुन तस्करी सम्बन्धमा छानबिन गर्न गठित आयोगले सत्तारुढ नेकपा (माओवादी केन्द्र)का उपाध्यक्षसमेत रहेका पूर्वसभामुख कृष्णबहादुर महरासँग बिहीवार बयान लिएको छ । सिंहदरवारस्थित गृहमन्त्रालयको पुरानो भवनमा रहेको कार्यालयमा बिहीवार आयोगले महरासँग झण्डै डेढ घण्टा बयान लिएको हो । 

विद्युतीय चुरोट (भेप्स)मार्फत भएको सुन तस्करी सम्बन्धमा महराको नाम जोडिएपछि आयोगले उनीसँग बयान लिएको हो । प्रहरीको केन्द्रीय अनुसन्धान ब्युरो (सीआईबी)ले गरेको अनुसन्धानमा चिनियाँ नागरिक दावाजिन वाङसँग महराको पटक–पटक फोनमा कुरा भएको तथ्य फेला परेको थियो । 

बयानमा महराले चिनियाँ नागरिकसँग फोनमा कुराकानी भएको स्वीकार गरेका छन् । ‘ती चिनियाँ नागरिक वाङसँग पुरानो सम्बन्धका आधारमा कुराकानी भएको हो, तर सुन तस्करीमा मेरो कुनै संलग्नता छैन,’ महराको भनाइ उद्धृत गर्दै स्रोतले लोकान्तरसँग भन्यो । 

सुन तस्करी प्रकरणमा बयानमा जाने महरा उच्च अधिकारी हुन् । महरा पूर्व उपप्रधान, गृह एवं अर्थमन्त्री समेत रहिसकेका नेता हुन् ।

सुन तस्करी प्रकरणमा महराका छोरा राहुललाई सीआईबीले यसअघि नियन्त्रणमा लिएर अनुसन्धान गरेको थियो । डिल्लीराज आचार्यको संयोजत्कवमा गठन भएको आयोगले सीआईबीले गरेको अनुसन्धानका आधारमा सुन तस्करीमा जोडिएका व्यक्तिसँग बयान लिइरहेको छ । 

सुन तस्करी सम्बन्धमा छानबिन गर्न गठित आयोगले चुडामणि उप्रेती ‘गोरे’सहित धेरै जनासँग बयान लिइसकेको छ । यसक्रममा आयोगले हेलिकप्टरमार्फत समेत सुन तस्करी हुने गरेको तथ्य फेला पारेको थियो । 

सरकारले गत असोज १५ गते उच्च अदालतका पूर्वन्यायाधीश आचार्यको संयोजकत्वमा छानबिन आयोग गठन गरेको थियो ।