काठमाडौंको ललितानिवासस्थित सरकारी जग्गा हिनामिना प्रकरणमा तत्कालीन भौतिक पूर्वाधार मन्त्री विजयकुमार गच्छदारले सफाइ पाएका छन् ।

विशेष अदालतका न्यायाधीशहरू खुशीप्रसाद थारू, रामबहादुर थापा र रितेन्द्र थापाको इजलासले बिहीबार गच्छदारलाई सफाइ दिएको हो ।

'प्रस्ताव पेश गर्न स्वीकृति गरेको आधारमा मात्र बदनियत पुष्टि हुने प्रमाणको अभावमा मन्त्रालयको निर्णयसम्मको जिम्मेवारीमा रहेका प्रतिवादी विजयकुमार गच्छदारउपर दाबी पुग्न नसक्ने,' विशेष अदालतको फैसलामा भनिएको छ ।

उनीसँगै अर्का पूर्वमन्त्री डम्बर श्रेष्ठले पनि सफाइ पाएका छन् ।

अख्तियार दुरुपयोग अनुसन्धान आयोगले तत्कालीन सांसद गच्छदार समेतलाई  विपक्षी बनाएर २०७६ माघ २२ गते आरोपपत्र दायर गरेको थियो ।

लगत्तै गच्छदारको सांसद पद निलम्बनमा परेको थियो । निलम्बित अवस्थामा नै उनको कार्यकाल सकिएको थियो ।

कर्मचारी र बिचौलिया दोषी ठहर 

यस प्रकरणमा विशेष अदालतले तत्कालीन सचिव दीप बस्न्यात, छविराज पन्त, मालपोत अधिकृतहरू कलाधर देउजा, सुरेन्द्रमान कपाली तथा बिचौलियाहरू रामकुमार सुवेदी, शोभाकान्त ढकाललगायतलाई भने दोषी ठहर गरेको छ ।