अख्तियार दुरुपयोग अनुसन्धान आयोगले सुर्खेतको सिम्ता गाउँपालिकाका तत्कालीन अध्यक्ष कवीन्द्रकुमार केसीसहित ११ जनाविरुद्ध भ्रष्टाचार मुद्दा दायर गरेको छ ।​​

सार्वजनिक सम्पत्तिमा हानिनोक्सानी पुर्‍याई भ्रष्टाचार गरेको आरोपमा केसीलगायत डिभिजन वन कार्यालय सुर्खेतका तत्कालीन डिभिजनल वन अधिकृत गोविन्दप्रसाद दहालसहित ११ जनाविरुद्ध बुधवार विशेष अदालत काठमाडौंमा मुद्दा दायर गरिएको आयोगका प्रवक्ता नरहरि घिमिरेले जानकारी दिए ।

प्रवक्ता दाहालका अनुसार गाउँपालिकाको वडा नम्बर ५ स्थित आली भन्ने स्थानमा निर्माण भएको हाइटेक नर्सरीमा अनियमितता भएको उजुरी आयोगमा परेको थियो ।

अनुसन्धानका क्रममा उच्च प्रविधिको नर्सरी स्थापना गरी बाँझो तथा खाली जमिनमा वृक्षारोपण तथा जडिबुटी खेती विस्तार गर्दा ८४ लाख ८६ हजार ६४२ रुपैयाँ हिनामिना गरेको पुष्टि भएको आयोगले जनाएको छ ।

यस्तै, आयोगले तत्कालीन सहायक वन अधिकृत टेकबहादुर रावल, तत्कालीन लेखापाल लक्ष्मीकुमारी थापा क्षेत्री​, सिम्ता सव-डिभिजन वन कार्यालयका तत्कालीन रेन्जर कमल चित्रकार र भोजप्रसाद उपाध्यायविरुद्ध पनि मुद्दा दायर गरेको छ।

यस्तै, सिम्ता हाइटेक नर्सरी उपभोक्ता समितिका अध्यक्ष जगत महतरा, उपभोक्ता समितिका सचिव चन्द्रप्रकाश थापा र उपभोक्ता समितिका कोषाध्यक्ष मीना पोखरेल हमालविरुद्ध समेत मुद्दा दायर गरिएको प्रवक्ता घिमिरेले जानकारी दिएका छन् ।

आयोगले ८४ लाख ८६ हजार ६४२ रुपैयाँ बिगो कायम गरी कैद र जरिवानाको सजायको मागदाबी गरेको छ ।