बम विस्फोटपछि चिनियाँ कामदारका लागि पाकिस्तानले बढायो सुरक्षा

एक आत्मघाती बम विस्फोटमा पाँच चिनियाँ कामदार मारिएको एक दिनपछि पाकिस्तानले मुलुकको उत्तर–पश्चिम क्षेत्रमा बेइजिङसम्बद्ध परियोजनाहरू निर्माण गरिरहेका चिनियाँ इन्जिनियरहरूको सुरक्षा बढाएको एक अधिकारीले बुधबार बताएका छन् । 

पाकिस्तान बेइजिङको सबैभन्दा नजिकको क्षेत्रीय सहयोगी हो र पाकिस्तानलाई हालैका वर्षहरूमा अर्बौं डलर लगानीको फाइदा भएको छ तर आफ्नो भूमिमा चिनियाँ श्रमिकहरूको सुरक्षाको प्रत्याभूति दिन पाकिस्तानले सङ्घर्ष गर्नुपरिरहेको छ । 

उत्तरपश्चिम खैबर पख्तुनख्वा प्रान्तको दासुमा एउटा जलविद्युत् बाँध निर्माण स्थलमा काम गरिरहेका चिनियाँ कामदारहरू इस्लामाबाद जाँदै गर्दा भएको आत्मघाती बम विस्फोटमा पाँच चिनियाँ इन्जिनियर र एक पाकिस्तानी चालकको मृत्यु भएको थियो । 

    प्रान्तीय गृह मन्त्रालयका एक शीर्ष अधिकारीले बुधबार खैबर पख्तुनख्वामा चिनियाँ इन्जिनियहरूको आतिथ्यता गर्ने दुई दर्जनभन्दा बढी साइटहरूमा सुरक्षा बढाइएको बताए । 

    “चिनियाँ नागरिक र अन्य सबै विदेशीहरूो सुरक्षा बढाउनका लागि सबै कानून प्रवर्तन एजेन्सीहरूलाई निर्देशन जारी गरिएको छ”, नाम उल्लेख नगर्ने सर्तमा ती अधिकारीले भने, “विदेशी नागरिकहरूलाई पनि आफ्नो आवागमनमा प्रतिबन्ध लगाउन निर्देशन दिइएको छ ।”

    सूचनामन्त्री अताउल्लाह तरारले इस्लामाबादमा पत्रकार सम्मेलनमा भने, “कुनै पनि अन्तरालको पहिचान गर्न र त्यसलाई हटाउन ध्यान केन्द्रीत गर्दै सुरक्षा प्रक्रियाको समीक्षा गरिने छ ।”

    यसैबीच हमलाका बारेमा थप विवरण आएका छन् । उक्त हमलाको अहिलेसम्म कसैले पनि जिम्मेबारी लिएको छैन ।