नेपाल ‘ए’ दोस्रो खेलमा आयरल्यान्ड वल्भ्ससँग पराजित भएको छ । 

शनिवार त्रिवि क्रिकेट मैदानमा भएको टी–२० शृंखलाको दोस्रो खेलमा नेपाल ‘ए’ आयरल्यान्ड वल्भ्ससँग ४० रनले पराजित भएको हो । 

दुई सय २५ रनको विजय लक्ष्य पछ्याएको नेपाल ‘ए’ले १७.५ ओभरमा अलआउट हुँदै १८४ रनमात्र बनाउन सक्यो ।

नेपालका लागि देव खनालले सर्वाधिक ४७ रन बनाए । त्यस्तै लोकेश बमले २५ र कप्तान विनोद भण्डारीले २६ रन जोडे ।

यस्तै बासिर अहमदले २७, आरिफ शेखले १४, पवन सराफले १० र कमल ऐरी ११ रन बनाए ।

यसअघि टस हारेर ब्याटिङ गरेको आयरल्यान्डले निर्धारित ओभरको खेलमा ६ विकेट गुमाएर २२४ रन बनाएको थियो । 

आयरल्यान्डका लागि निल रकले सर्वाधिक ७१ रन बनाए । त्यस्तै पिटर मुरले ६५ रन, जेम्स मोकुलमले २६ रनको योगदान दिए । 

यसअघि शुक्रवार पनि नेपाल ‘ए’ आयरल्यान्ड वल्भ्ससँग २१ रनले पराजित भएको थियो ।

शनिवार दोस्रो खेलमा पनि जीत हासिल गरेसँगै आयरल्यान्डले टी–२० श्रृंखला एक खेलअघि नै जितेको छ ।

अब सोमवार यी दुई टोलीबीच अर्को खेल हुनेछ । त्यसको नतिजाले कुनै असर पर्ने छैन ।