आठौँ संस्करणको विराट गोल्ड कप फूटबलको शनिवार हुने फाइनल खेल हुँदैछ ।  घरेलु टोली सांग्रिला मोरङ एफए र मच्छिन्द्र एफसी काठमाडौं उपाधिका लागि भिड्दै छन् । दुवै टोलीले उपाधि आफ्नो पक्षमा आउने दाबी गरेका छन् । 

विराटनगरको शहीद रंगशालामा शनिवार ६ः४५ बजे हुने फाइनलमा मच्छिन्द्र पहिलो पटक विराट गोल्डकपको उपाधि जित्ने लक्ष्यमा छ भने घरेलु टोली ह्याट्रिक गर्ने दाउमा रहेको छ ।  

सांग्रिलाले इटहरी गोल्डकपको च्याम्पियन चर्च ब्वाइज युनाइटेड र पाहुना टोली भुटानको आरटीसी एफसीलाई हराउँदै फाइनलमा प्रवेश गरेको हो । सांग्रिला क्वार्टरफाइलनमा भुटानको आरसीटीलाई  ३–० गोल अन्तरले र सेमिफाइनलमा  चर्च ब्वाइजलाई सडन डेथमा ४–३ गोलले हराउँदै उपाधिनजिक पुगेको हो । 

विराट गोल्डकपको पहिलोपटक फाइनलमा पुगेको मच्छिन्द्रले क्वार्टरफाइनलमा  भारतीय क्लब कालकत्ताको साउर्थन समितिलाई  २–१ गोलले पन्छाउँदै अन्तिम चारको यात्रा गरेको थियो । सेमिफाइनलमा मच्छिन्द्रले भारतको सिक्किम ड्रागानलाई १–० गोलले हराएर फाइनलमा स्थान पक्का गरेको हो । 

सांग्रिलाले लिग विजेता र इटहरी गोल्डकपको च्याम्पियन भएको सशक्त टीमलाई पराजित गरेर फाइनल यात्रा तय गरेको छ । उसले यसलाई जीतको आधार भनेको छ । घरेलु टोलीले तेस्रोपटक आफूलाई प्रतियोगिताको उपाधि नजिक पुर्याएको हो ।

यसअघि विसं २०१८ सालमा तत्कालीन महेन्द्र गोल्ड कपमा घरेलु टीम मोरङ– ११ फाइनलमा पुगेर उपविजेता भएको थियो । त्यसबेलाको पहिलो उपाधि भारतको कलकत्ता भएको थियो । 

२०१९ सालमा मोरङ ११ ले उपाधि हात पारेको थियो । गत वर्षको सातौँ संस्करणमा विराटनगर सिटीले गोल्डकपको उपाधि जितेको थियो । पाहुना टोली भारतको केरलास्थित लुका सकर क्लबलाई फाइनलमा पराजित गर्दै विराटनगर सिटीले उपाधि हात पारेको थियो ।  त्यसपछि आठौँ संस्करणसम्म आइपुग्दा घरेलु टीम फाइनलमा पुगेको हो । 

विराटनगरमा शुक्रवार  प्रि–म्याच कन्फ्रेन्समा विराट गोल्डकपको फाइनलअघि दुवै टीमका प्रशिक्षक र कप्तानले उपाधि जित्नका लागि खेल्ने बताएका छन् ।

मच्छिन्द्रका प्रशिक्षक सन्तोष न्यौपानेले आठौँ संस्करणको विराट गोल्ड कपमा टीमको लक्ष्य उपाधि जित्नु रहेको दाबी गरेका छन् । ‘यसअघि केपी ओली कप र बागमती गोल्डकपको उपाधिसमेत यही टोलीले उठाइसकेको छ । उनले खेलको शुरूवातदेखि आक्रमण रणनीतिमा खेलाडी मैदानमा उत्रिने बताए । मच्छिन्द्रका कप्तान विशाल श्रेष्ठले पहिलोपटक फाइनल पुगेकोले नयाँ च्याम्पियन बनेर इतिहास रच्ने दाउमा रहेको उनले बताए ।  

सांग्रिलाका प्रशिक्षक रानु राना मगरले सांग्रिलाले ४–४–२ को रणनीतिमा खेल्ने बताए । अधिकांश ‘ए’ डिभिजन क्लबका अनुभवी खेलाडी समेट्नुका साथै राम्रो तालमेल भएकाले च्याम्पियन बन्नेमा ढुक्क रहेको उनको भनाइ छ । 

सांग्रिलाका कप्तान अभिषेक लिम्बूले होम ग्राउन्डमा घरेलु दर्शकको साथ सहयोग रहने भएकाले आफूहरूले उत्कृष्ट खेल प्रदर्शन गर्ने बताउँदै उपाधि जित्ने दाबी गरे । 

चैत १५ देखि २४ गतेसम्म सञ्चालन हुने प्रतियोगितामा  विदेशी तीन टीमसहितका स्वदेशी ‘ए’ डिभिजनका १० टोलीको सहभागिता रहेको छ । विजेताले ११ लाख र उप विजेताले ५ लाख ५० हजार रुपैयाँ पाउने विराट गोल्डकप फूटबल ट्रस्टका अध्यक्ष किशोरबहादुर शाहीले जानकारी दिए ।

उत्कृष्ट प्रशिक्षकलाई, उत्कृष्ट गोलरक्षक र सर्वाधिक गोलकर्तालाई जनही २१ हजार रुपैयाँ पुरस्कार प्रदान गरिनेछ ।