गोरखा पर्यटकहरूको लागि नौलो गन्तव्य होइन । यहाँको इतिहास, मनास्लु हिमाल र मनासलु सर्किट, विभिन्न जातीय संस्कृति तथा संस्कारले गोरखालाई विश्वमा नै चिनाएको छ । 

पछिल्लो समय सडक यातायातले जोडिएका गोरखाका विभिन्न गाँउहरूमा आन्तरिक तथा बाह्य पर्यटकहरूको चहलपहलसमेत बढेको देखिन्छ । 

यातायातको सहज पहुँचसँगै पर्यटनका नयाँ नयाँ गन्तव्यहरू पहिचान भइरहेका छन् । यसैगरी नयाँ गन्तव्यको रूपमा विकास हुँदै गरेको छ भच्चेक, बारपाक माछीखोला ट्रेक ।

गोरखाको अजिरकोट गाँउपालिका भच्चेकबाट शुरूगरी धार्चे गाँउपालिकाको माछिखोलामा पुगी अन्त्य हुने ट्रेक आन्तरिक तथा बाह्य पर्यटकहरूका लागि आकर्षक गन्तव्य हुनसक्छ । 

ट्रेकमा भच्चेक बजार, मादले गाँउ, गोगनपानी, हरेनघडेरी, झ्यावा, बालुवा बजार, बारपाक, लाप्राक, गुम्दा, यामगाँउ, लप्सीबोट गाँउहरू पर्दछ । 

२०७२ सालको गोरखा भूकम्पले क्षति पुगेका यी गाँउहरूको अवलोकन गर्दै स्थानीय उत्पादनको स्वाद लिँदै यात्रा गर्न सकिने रुटमा गुरुङ्ग संस्कार र संस्कृतिलाई नजिकबाट बुझ्न समेत सकिन्छ । 

तस्वीर: नेपाल फोटो लाइब्रेरी