विधेयक अधिवेशनको रूपमा चिनिने संघीय संसद्को हिउँदे अधिवेशनमा प्रतिनिधिसभाले जम्मा ३ वटा विधेयक मात्र पारित गरेको छ । २०८० माघ २२ गते शुरू भइ २०८१ वैशाख २ गते समापन भएको अधिवेशनले ३ वटा कानून बनाएको हो । 

७० दिन चलेको अधिवेशनमा २३ दिनमा २३ पटक बैठक बसी ८१ घण्टा ५५ मिनेट संसदीय काममा व्यतित गरेको थियो । अधिवेशनबाट अनुगमन तथा मूल्याङ्कन विधेयक २०७६, खाद्य सुरक्षा तथा गुणस्तर विधेयक २०७७ पारित भएका छन् । 

यस्तै ‘सम्पत्ति सुद्धीकरण (मनी लाउन्डरिङ) तथा व्यावसायिक वातावरण प्रवद्र्धनसम्बन्धी केही नेपाल ऐनलाई संशोधन गर्ने विधेयक’ राष्ट्रियसभाबाट भएको संशोधनलाई स्वीकार गरी विधेयक पारित भएको छ । 

कतिपय विधेयकहरू समितिमा दफावार छलफलका क्रममा रहेको र केही सामान्य छलफल भइसकेको सभामुख देवराज घिमिरेले बैठकलाई जानकारी गराए । तर, संसदको विधेयक अधिवेशनमा अपेक्षाकृत कानून पारित हुन सकेनन् । 

अधिवेशनको अन्तिम बैठकमा सभामुख घिमिरेले लगातार १० बैठकमा अनुपस्थित सांसदहरूको अनुपस्थितिको सूचना सुनाए । मष्तिस्कघातबाट बिरामी परेका नेकपा (एमाले)का सांसद वसन्त नेम्वाङ १२ वटा बैठक, थेरापी गराइरहेकी सांसद मनोरमा शेरचन १३ वटा बैठक र सोनम मुर्मू ११ बैठकमा अनुपस्थित रहेको सूचना जानकारी गराए । 

सभामुख घिमिरेले संसद्को आगामी अधिवेशनमा दलहरूबीच सहमति जुट्ने विश्वास व्यक्ति गरे । उनले बैठकमा अधिवेशन अन्त्य सम्बनधी राष्ट्रपतिले पढाएको पत्र पढेर सुनाएका थिए । 

यसअघि सरकारले आइतवार रातिदेखि अधिवेशन अन्त्य गर्न राष्ट्रपतिलई सिफारिस गरेको थियो । संसदीय छानबिनको प्रश्नबाट भागेर सरकारले अधिवेशन अन्त्य गरेको आरोप नेपाली कांग्रेसले लगाएको छ ।