प्रमुख प्रतिपक्षी दल नेपाली कांग्रेसले सरकारी ठगीमा जोडिएका मन्त्रीबारे प्रश्न उठ्न थालेपछि संसद्को अधिवेशन अन्त्य गरिएको आरोप लगाएको छ । अधिवेशन अन्त्य गर्ने सरकारको निर्णयप्रति कांग्रेसले निन्दा र भत्र्सना गरेको छ । 

आइतवार बसेको कांग्रेस संसदीय दलको बैठकले सदनमा उठेका प्रश्नबाट भागेर सरकार भाग्ने काम गरेको निष्कर्ष निकालेको हो । सरकारले संसदीय मूल्य–मान्यताको बर्खिलाप गरेको निष्कर्ष बैठकले निकालेको कांग्रेस संसदीय दलका प्रमुख सचेतक रमेश लेखकले जानकारी दिए । 

‘सरकारमा रहेका बहालवाला मन्त्री सकारी ठगीमा जोडिएकोबारे संसदीय छानबिनको माग प्रतिपक्षी दलले गरिरहेका थिए । सरकारले सदनमा बहुसंख्यक सदस्यले उठाएको विषयमा निष्कर्षमा पुग्नु पर्नेमा संसद्बाट भाग्ने काम गरेको छ । यो संसदीय मूल्य–मान्यताको बर्खिलाप हो,’ लेखकले भने । 

कांग्रेसले सहकारी ठगीमा जोडिएका उपप्रधान एवं गृहमन्त्री रवि लामिछानेको सम्बन्धमा संसदीय छानबिनको माग गर्दै आइरहेको थियो । ‘सहकारी ठगीमा उपप्रधानमन्त्रीको संलग्नतको विषय तथ्य र प्रमाणका आधारमा उठाउँदै आएपनि कांग्रेसले संसद् अवरुद्ध गरेको थिएन । सरकारको तानशाहीका कारण दुई दिन अवरुद्ध भएको हो,’ लेखकले भने । 

आइतवारदेखि संसद्को अधिवशन अन्त्य गरिएको विषयमा छलफल गर्न कांग्रेसको बैठक बसेको थियो । बैठकका कांग्रेस संसदीय दलका नेतासमेत रहेका पार्टी सभापति शेरबहादुर देउवाले लाखौँ सर्वसाधारणको पैसा जोखिममा परेकोले सहकारी ठगीमा संसदीय छानबिनको माग गरिएको बताएका थिए ।