बार्सिलोनाको पराजित भएसँगै रियल म्याड्रिडले २०२३–२४ सिजनको स्पेनिस शीर्ष डिभिजन लिग ला लिगाको उपाधि जितेको छ । शनिबार राति बार्सिलोना जिरोनाविरुद्ध ४–२ ले पराजित भएसँगै रियलले चार खेलअगावै लिग उपाधि जितेको हो ।

घरेलु टोली जिरोनाविरुद्ध बार्सिलोनाले खेलमा दुई पटक अग्रता लिएपनि हार बेहोर्न पुग्यो । खेलको तेस्रो मिनेटमा नै आन्द्रेयास क्रिस्टेनसनले गोल गर्दै बार्सिलोनालाई अग्रता दिलाएका थिए । तर यो अग्रता धेरैबेर टिक्न सकेन । चौथो मिनेटमा नै आर्टेम डोभबिकले जिरोनाका लागि बराबरी गोल फर्काए ।

पहिलो हाफको अन्त्यतिर पेनाल्टीमार्फत रोबर्ट लेवान्डोस्कीले बार्सिलोनालाई पुनः अग्रता दिलाए । तर दोस्रो हाफमा बार्सिलोनाले तीन गोल खाना पुग्यो ।

६५औं मिनेटमा क्रिस्टियन पोर्टुले जिरोनाका लागि पुनः बराबरी गोल गरे । ६७औं मिनेटमा लिने मिगेल गुटिएरेजले गोल गर्दै जिरोनालाई अग्रता दिलाए । ७५औं मिनेटमा पोर्टुले जिरोनाका लागि चौथो गोल गरे ।

लिग विजेता रियलको ३४ खेलमा ८७ अंक रहेको छ । जिरोना

दोस्रो स्थानमा छ । उसले ७४ अंक जोडेको छ । तेस्रो स्थानमा रहेको बार्सिलोनाको ७३ अंक छ । 

रियलले शनिबार नै भएको खेलमा काडिजविरुद्ध ३–० को जित हासिल गरेको थियो । रियलको जितमा ब्राहिम डियाज, जुड बेलिङ्घम र जोसेलुले एक–एक गोल गरे ।

रियलको यो कीर्तिमानी ३६ पटक स्पेनिस लिग उपाधि हो । बार्सिलोनाको भने २७ पटक उपाधि जितेको छ । यस्तै एट्लेटिको म्याड्रिडले ११ पटक उपाधि हात पारेको छ ।