कोशी प्रदेशमा नयाँ सरकार गठनको आव्हान गर्न गठबन्धनले दबाब दिइरहेका छन् । गठबन्धनमा आबद्ध दलहरू एमाले र माओवादी केन्द्रका सांसदहरूले आज बिहानैदेखि प्रदेश प्रमुख परशुराम खापुङलाई पटक–पटक दबाब दिइरहेका छन् । 

मुख्यमन्त्री केदार कार्कीले विश्वासको मत नलिएपछि सरकार विहीनताको अवस्था बनेको भन्दै उनीहरूले दबाब दिएका हुन् । 

अर्कोतिर प्रदेश प्रमुख खापुङ भने मुख्य न्यायाधिवक्ता कार्यालयको रायका आधारमा नयाँ सरकारको आह्वान गर्ने तयारीमा रहेको उनीनिकट स्रोतले जनाएको छ ।  

एमाले र माओवादीले २०८० चैत २६ गते सरकारलाई दिएको समर्थन र विश्वासको मत फिर्ता लिएका थिए । २०८१ वैशाख २५ गतेभित्र मुख्यमन्त्री केदार कार्कीले प्रदेशसभाबाट विश्वासको मत लिनुपर्नेमा नलिएकाले स्वतः पदमुक्त भएको दाबी गर्दै उनीहरूले नयाँ सरकार गठनको प्रक्रिया थाल्न प्रदेश प्रमुखलाई पत्र बुझाएका छन् । पत्रमा एमाले संसदीय दलका नेता हिक्मतकुमार कार्की र माओवादी केन्द्र संसदीय दलका नेता इन्द्रबहादुर आङ्बोको हस्ताक्षर गरेका छन् ।

सरकार रिक्तताको अवस्था रहन नसक्ने भएकाले मुख्यमन्त्रीले विश्वासको मत नलिएर पदमुक्त भएको दिन नै नयाँ सरकार गठनको आह्वान गर्नुपर्ने भन्दै एमाले र माओवादीले प्रदेश प्रमुखलाई दबाब दिएका हुन् । 

प्रदेश प्रमुखले संविधानको धारा १६८ को उपधारा ५ अनुसार नयाँ सरकार गठनको लागि आह्वान तयारी रहेको स्रोतले जनाएको छ  । अर्कोतिर गठबन्धन पनि आजै नयाँ सरकार गठन गर्ने तयारीमा रहेको छ  । 

प्रदेशसभाका बहुमत सांसदको हस्ताक्षरसहित सरकार गठनको दाबी गरिने एमालेका प्रमुख सचेतक रेवतीरमण भण्डारीले जानकारी दिए ।