कोशी प्रदेशमा नयाँ सरकार गठनको आह्वान गर्दा संविधानको कुन धारा प्रयोग गर्ने भन्ने विषयलाई लिएर प्रदेश प्रमुख र दलहरूबीच नोक–झोक चलेको छ ।

एमाले र माओवादी केन्द्रले प्रदेश प्रमुखको कार्यालयमा नयाँ सरकार गठनको माग गर्दै बुधबार साढे ३ बजे पत्र दर्ता गराएका थिए  ।  

नयाँ सरकार गठनको आह्वान गर्दा संविधानको कुन धारा र उपधारा उल्लेख गर्ने भन्ने विषयमा प्रदेश प्रमुख परशुराम खापुङ र दलका नेताहरूबीच नोक–झोक चलेको नेताहरूले बताएका छन् ।

मुख्य न्यायाधिवक्ताको कार्यालयमा सुझाव माग गरिएकोमा सो आएपछि  मात्रै दर्ता गर्ने तयारीमा रहेको प्रदेश प्रमुखको कार्यालयले जनाएको छ ।

संविधानको धारा १६९ को उपधारा (१) मा मुख्यमन्त्रीको पद रिक्त हुने अवस्था उल्लेख छ । जसमा मुख्यमन्त्रीले प्रमुखसमक्ष लिखित राजीनामा दिएमा, धारा १८८ बमोजिम विश्वासको प्रस्ताव पारित हुन नसकेमा वा उनका विरुद्ध अविश्वासको प्रस्ताव पारित भएमा, उनी प्रदेश सभाको सदस्य नरहेमा, उनको मृत्यु भएमा पद रिक्त हुने उल्लेख छ ।

कांग्रेसबाट विद्रोह गरेर एमालेको सहयोगमा केदार कार्की मुख्यमन्त्री बनेका थिए । विभिन्न समीकरण फेरबदल भएसँगै पछि उनी अल्पमतमा परेका हुन् ।  कार्की कांग्रेसको इतर पक्षका नेता डा शेखर कोइरालानिकट मानिन्छन् ।