रविमाथि संसदीय छानबिन समिति बने भोलिपल्टदेखि कांग्रेसले राजीनामाको माग चर्काउँछ- ओली

नेकपा एमालेका अध्यक्ष केपी शर्मा ओलीले सत्ताबाट बाहिरिनु परेपछि कांग्रेसले रन्थनिएर गृहमन्त्रीमाथि संसदीय छानबिन समितिको कुरा गरेको आरोप लगाएका छन् ।

संसदीय छानबिन समिति गठन भएको भोलिपल्टदेखि गृहमन्त्रीको राजीनामाको खेल शुरू हुने उनले दाबी गरे ।

पार्टी संसदीय दलको बैठकलाई शुक्रवार बानेश्वरमा सम्बोधन गर्दै ओलीले सत्ता समीकरण फेर्ने प्रस्तावमा रास्वपा तयार नभएपछि गृहमन्त्रीमाथि संसदीय छानबिनको माग चर्काएको दाबी गरेका हुन् ।

‘यो अधिवेशनमा कांग्रेसले के गर्छ हेर्नुपर्नेछ । कांग्रेस रन्थनिएको छ । एकातिर प्रधानमन्त्रीको अफर गरेको छ, अर्कोतिर संसदीय छानबिनको कुरा गरिरहेको छ’, ओलीले भने, ‘समिति बनिसकेपछि मन्त्रीको पदमा बस्न मिल्छ ? छानबिनलाई प्रभावित गर्दैन भन्नेछ । छानबिन समिति बनाइसकेपछि तत्काल राजीनामाको खेल शुरू हुन्छ ।’

समीकरण फेर्ने शर्तमा कांग्रेसले रविलाई डेढ वर्ष प्रधानमन्त्री खाइदिनुस् भन्दै हिँडेको ओलीले दाबी गरे ।

‘डेढ वर्ष प्रधानमन्त्री भइदेउ भनेर गरेको प्रस्ताव अस्वीकार गरेपछि कांग्रेसका प्रमुख सचेतक यति ठूलो फाइल लिएर हिँडिरहेका छन्’ ओलीले भने ।

सरकार पल्टाउने खेल

अध्यक्ष ओलीले राजनीतिक अस्थिरता लम्ब्याउन सरकार पल्टाउने कसरत र चलखेल भइरहेको बताए ।

‘राजनीतिमा अस्थिरता आइरहेको छ, भर्खर सरकार बन्यो । त्यो सरकार पल्टाउने खेल भइरहेको छ । गत वर्ष २ महिनामा उल्टाएको थियो । १० वटा सिट भएको पार्टी (नेकपा एस)का प्रतिनिधिले फागुन ३० गते विश्वासको मतको बेला विल्कुल अस्वस्थ, आक्रोशित र कुण्ठाग्रस्त कुरा गरेका थिए । सो दलका नेता (माधव नेपाल)ले म प्रधानमन्त्री हुनै आँटे भनेर कसैको मन भतभत पोलेको छ भनेर भनिरहेका छन्’ ओलीले भने । 

ओलीले राजनीतिमा छुद्र खेल नखेल्न कांग्रेसलाई सुझाव दिए ।

‘कांग्रेसका साथीहरू यस अधिवेशनमा कसरी आउनु हुन्छ थाहा छैन । राजनीतिमा यस्तो छुद्र खेल खेलिनु हुन्न । कुनै पार्टीलाई सनक चल्यो भन्दैमा छानबिन समिति गठनको कुरा हुन्न’, ओलीले भने ।