विराटनगर, १२ फागुन– कैदी होटलबाट भागेपछि प्रहरीलाई कार्वाही भएको बिषयमा मोरङ कारागारमा कैदीबन्दी र प्रहरीबीचको मनमुटाव बाहिर आएको छ । प्रहरीको असहयोग विरुद्ध कैदीबन्दीले केहीबेर कारागारमा नारावाजी गरेका छन्  । 

कैदी बन्दीलाई वेवास्ता गरेको भन्दै उनीहरु आन्दोलित भएका हुन् ।  बिरामी कैदीबन्दीले सरकारबाट पाउने स्वास्थ्य उपचारको सेवा पनि नपाएको गुनासो गरेका छन् । शुक्रवार ६ जना कैदीबन्दीलाई कोशी अञ्चल अस्पताल पु-याएर प्रहरीले फर्काएको छ । तर उनीहरु उपचार हुन नपाएपछि त्यसै फर्किएका छन् । 

कारागार सुरक्षा प्रहरीले कारागार प्रशासनबाट ६ जना कैदी बन्दीलाई अस्पताल लैजाने पत्र बिहान १० बजेर २० मिनेटमा प्राप्त गरेको थियो तर बिरामी भने दिउँसो १२ बजेर ५० मिनेटमा मात्र अस्पताल पुगे । 

त्यो समयसम्म चिकित्सक अस्पतालबाट बाहिरी सकेका थिए । जसका कारण बिरामीलाई उपचार र्नै नगराई जेल फर्काईएको थियो । एक्स–रे र रगतको जाँच गर्न लगाउँदा त्यो नगरी फर्काएको उनीहरुको गुनासो छ । 

प्रहरीले आफूहरुको स्वास्थ्यमा समेत वेवास्ता र हेलचक्राइ गरेसँगै कारागार भित्र कैदीबन्दीले नारावाजीले गरेका छन् ।  बिरामी कैदीबन्दीले सरकारबाट पाउनु पर्ने स्वास्थ्य उपचारको सेवाबाट समेट बञ्चित हुनु परेको बताए । कारागारका आन्तरिक प्रशासन प्रमुख अभिषेक गिरीले कैदी बन्दीको उपचारमा प्रहरीले लापरवाही गरेको स्विकार गरे । 

जेलको सुरक्षामा रहेका नेपाल प्रहरीका प्रहरी नायव निरीक्षक गणेश राईले नाईकेहरुलाई हत्कडी नलगाई अस्पताल लैजाने दिईएको सुबिधा रोकिएकोे र आफन्त भेट्न आउँदा बाहिर आउने सुबिधा कटौती गरिएकोले त्यसैको आधारमा योजनाबद्ध रुपमा कैदीबन्दी प्रहरी बिरुद्ध लागेको बताउँछन् । 

उनले भने, ‘नाईकेलाई दिईँदै आएको सेवा सुबिधा कटौती भएपछि हाम्रै बिरुद्ध उनीहरु लागेका हुन् ।’

कारागारका जेलर प्रेमप्रसाद सापकोटासँग यस बारेमा जानकारी लिँदा उनले कारागार प्रशासनले कैदी बन्दीलाई जुनसुकै  समयमा अस्पताल लैजाने गरेको जानकारी दिए कारागार प्रशासनले २४ सै घण्टा आबस्यकताको आधारमा २४ सै घण्टा अस्पताल लैजाने गरेको उनको भनाइ छ ।