बिराटनगर, ८ चैत– प्रदेश नम्वर १ को प्रदेशसभा नियमावली २०७४ आज (बिहीवार) पारित भएको छ । प्रदेशसभाको सातौं बैठकले २ सय ११ नियम र ७ अनुसूची भएको नियमावली सर्वसम्मतिले पारित गरेको हो । 

प्रदेशसभा सदस्य लिलावल्लभ अधिकारीको संयोजकत्वमा गठन भएको ११ सदस्यीय प्रदेशसभा नियमावली मस्यौदा समितिले तयार गरी सदनमा प्रस्ताव गरेको नियमावली संशोधनसहित पारित भएको हो । 

सदनमा पेश भएको नियमावली मस्यौदामाथि नेकपा एमालेकी सांसद उषाकला राईले संशोधन दर्ता गराएकी थिइन् । नियमावलीमा व्यवस्था गरिएको शुन्य समय र प्रश्नोत्तर समयको छुट्टा–छुट्टै प्रावधानले अलमल भएको भन्दै उनले स्पष्ट हुने गरी एउटा मात्र व्यवस्था गर्न संशोधन दर्ता गराएकी थिइन् । राईले दर्ता गराएको संशोधन प्रस्ताव सर्वसम्मतीले पारित भएपछि नियमावलीको अंग बनेको घोषणा गरिएको थियो । संशोधन पछि शुन्य समयको अवधि एक घण्टा ३० मिनेट कायम भएको छ । नियमावलीले विभिन्न सातवटा संसदीय समिति गठन हुने व्यवस्था गरेको छ ।  

संसदको नियमित कार्य संचालनलाई व्यवस्थित गर्न झन्झटिलो विधिहरुलाई सकेसम्म समावेश नगरी छोटो र प्रभावकारी हुने गरी मौलिकरुपमा तयार पारिएको मस्यौदा समितिका संयोजक लिलावल्लभ अधिकारीले जानकारी दिए । 

अधिकारीले प्रस्तताव गरेको नियमावली मस्यौदामाथि १३ जना सांसदहरुले टिप्पणी गरेका थिए । प्रदेशसभा नियमावलीमाथि बिचार गरियोस् भन्ने प्रस्तावमा टिप्पणी गर्दै नेकपा एमालेका सांसद रामबहादुर राईले गलत क्रियाकलाप गर्ने सांसदलाई निलम्वन गर्ने समयमा एकरुपता हुनुपर्ने बताए । 

यसैगरी सांसद सर्वध्वज साँवाले बैठक समयमा शुरु गर्ने र जिम्मेवार बन्ने विषय पनि नियमावलीमा व्यवस्था गर्नुपर्नेमा जोड दिएका थिए । नेपाली कांग्रेसका सांसद तथा सचेतक केदार कार्कीले सहमतिको संस्कारबाट अघि बढ्न र दम्भ नराख्न आग्रह गरे । उनले नियमावली सांसदको आचारसंहिता भएकोले सबैले पालना गर्ने र समस्या आए परिमार्जन गरेर अघि बढ्ने विधिमा जानु पर्ने बताए । कांग्रेसका अर्का सांसद सुयर्माराज राईले प्रदेश नम्वर १ लाई समुन्नत र सुसंस्कृत बनाउन आफ्नोपन र मौलिकतालाई ख्यालमा राखेर मस्यौदा तयार पारेकोले समर्थन रहेको जनाए । 

छलफलमा नेकपा एमालेका सांसदहरु उषाकला राई, निरन राई, हिराकुमार थापा, यशोधा अधिकारी, नेकपा माओवादी केन्द्रका नारायणबहादुर मगर र सीता थेवे सहभागी भए । 

यसैगरी सघीय समाजवादी फोरमका तर्फबाट जयराम यादव, राष्ट्रिय प्रजातन्त्र पार्टीका इन्दिरा राई र संघीय लिम्वुवान राष्ट्रिय मञ्चकी बिष्णु तुम्वाहाम्फेले नियमावली मस्यौदामाथि आफ्नो धारणा राखेका थिए । 
नियमावली पारित पछि चैत १४ गते दिउँसो १ बजेसम्मका लागि बैठक स्थगित भएको छ ।