एएनईएमपी प्रालि र प्याब्सनको इलाम नगर समितिको संयुक्त आयोजनामा इलाममा 'किड्ज एण्ड टीन्ज' कार्यक्रमको पहिलो अडिसन सम्पन्न भएको छ ।

विगत १० वर्षदेखि नेपालका विभिन्न सहर र स्थानमा सौन्दर्य प्रतियोगिताका साथै विद्यालयस्तरमा विद्यार्थीको प्रतिभा प्रष्फुटन हुने गरी कार्यक्रमको आयोजना गर्दै आइरहेको एएनईएमपीले यसपटक इलाममा कार्यक्रम आयोजना गरेको हो । 

उक्त कार्यक्रमको पहिलो अडिसन सम्पन्न भइसकेको छ । अडिसनमा ८ देखि १६ वर्षसम्मका करिब २ सय विद्यार्थीको सहभागिता रहेको थियो ।

अडिसनमा १७ विद्यालयका ५० जना विद्यार्थीहरू पास भएका छन् भने दोस्रो राउण्डको अडिसन पुनः हुने आयोजकले जनाएका छन् ।

अडिसनपछि चालू तालिममा प्रतियोगीले व्यक्तित्व विकास, लिडरशीप विकास गर्ने अवसर पाउनुका साथै आत्मविश्वासको तह बढाउन सक्नेछन् ।

बालबालिकाहरुमा सफल मानिसभन्दा असल मानिस बन्न उत्प्रेरणा गर्नुका साथै भविष्यमा समाज र देशको नेतृत्व गर्न सक्ने बनाउनु र असल आचरणको विकास गर्न सिकाउनु नै यस कार्यक्रमको मुख्य उदेश्य रहेको कार्यक्रम संयोजक सन्ध्या बरालले बताइन् ।

यस कार्यक्रमको ग्रान्ड फिनाले चाहिँ यही वैशाख २१ गते इलामको सिटी हलमा हुने आयोजकले बताएको छ ।

संयोजक बरालका अनुसार ग्रान्ड फिनालेमा स्थानीय तथा राष्ट्रियस्तरका कलाकार र अन्य विशेष व्यक्तित्वहरुको उपस्थित हुनेछन् ।