नेपालको पहिलो तथा लोकप्रिय फूड डेलिभरी कम्पनी फूडमान्डुले चितवनमा पनि आफ्नो सेवा विस्तार गरेको छ ।​​

फूडमान्डुको सेवा काठमाडौं, ललितपुर, भक्तपुर, कीर्तिपुर र पोखरा हुँदै अब चितवनमा पनि विस्तार भएको हो ।

यही वैशाख १४ गतेदेखि चितवनवासीले अनलाइनबाटै खानेकुराको अर्डर गर्न सक्ने कम्पनीले जनाएको छ ।

'फूडमान्डु अब चितवनमा पनि विस्तार भएको घोषणा गर्न पाउँदा हामी धेरै हर्षित छौं । चितवनमा रहेका प्रख्यात रेस्टुरेन्टहरूका खानेकुरा घर, अफिस वा ग्राहकले चाहेको ठाउँमा नै अनलाइनमार्फत डेलिभर गर्न हामी उत्साहित छौं', कम्पनीका ब्रान्ड एण्ड मार्केटिङ म्यानेजर इनेशा भट्टराईले भनिन् ।

त्यस्तै कम्पनीका संस्थापक तथा प्रबन्ध निर्देशक मनोहर अधिकारीले नेपालका मुख्य शहरहरूमा क्रमशः सेवा विस्तार गरिने बताए । 'हामी फूडमान्डुलाई फूड डेलिभरीको अग्रणी कम्पनीको रूपमा नेपालका मुख्य शहरहरूमा क्रमशः फैलाउने योजनामा छौं । काठमाडौं, पोखरा हुँदै अब चितवनमा पनि हाम्रो सेवा विस्तार गर्न पाउनु हाम्रो लागि गर्वको कुरा हो', उनले भने ।

स्थापना भएको १३ वर्ष पुगेको नेपालको पहिलो अनलाइन फूड डेलिभरी प्लेटफर्म फूडमान्डुले काठमाडौं र पोखरामा पाएको सफलता अब चितवनमा पनि पाउने विश्वास लिएको छ ।​​​

चितवनवासीलाई डेलिभरी सेवा दिन अहिले फूडमान्डुले पहिलो चरणमा स्थानीय रेस्टुरेन्ट तथा होटलहरूसँग सहकार्य गरेको छ । साथै भविष्यमा अन्य सेवाहरू पनि विस्तार गर्दै जाने प्रतिबद्धता कम्पनीको छ ।​​​

फूडमान्डुले आफैं खाना बनाउँदैन, रेस्टुरेन्टहरूमा पाइने खानालाई उपभोक्ताको घरदैलोसम्म ल्याइदिने काम गर्दछ । ग्राहकले मोबाइल एप, वेबसाइट र फोनमार्फत खाना अर्डर गर्न सक्छन्, जसलाई फूडमान्डुमा आबद्ध रेस्टुरेन्टहरूले तयार गर्छन् । फूडमान्डुसँग अहिले १,००० भन्दा बढी रेस्टुरेन्टहरु आबद्ध छन् ।

चितवनमा सेवा विस्तार गर्ने क्रममा कम्पनीले वैशाख ३१ गेतसम्म हरेक अर्डरमा FOODSAFARI कोड प्रयोग गर्दा ३० प्रतिशत (रु.५०० सम्म) छुट पाउने घोषणा गरेको छ ।

यो उपलब्धिलाई निरन्तरता दिँदै फूडमान्डुले अन्य मुख्य शहरहरूमा पनि छिट्टै सेवा विस्तार गर्ने जनाएको छ ।