काठमाडौं, ४ चैत्र– प्रधानमन्त्री केपी शर्मा ओलीले आम जनताले परिवर्तन महशुस गर्नेगरी काम गर्न नवनियुक्त मन्त्रीहरुलाई निर्देशन दिएका छन् । सरकार असामान्य जिम्मेवारी बोकेर सिंहदरवार प्रवेश गरेको कुरा ख्याल गर्न उनले मन्त्रीहरुको ध्यानाकर्षण गराए । 

नवनियुक्त मन्त्री र नेपाल सरकारका सचिवहरुलाई आइतवार सिंहदरवारमा सामूहिक निर्देशन दिँदै प्रधानमन्त्री ओलीले सरकारी कार्यालयवाट हुने सेवामा ढिला सुस्ती स्वीकार्य नहुने बताएका हुन् । उनले वर्तमान सरकार केवल निरन्तरता मात्र नभएकोले जनताको सेवामा समर्पित भएर काम गर्न निर्देशन दिएका हुन् । 

सरकार असामान्य जिम्मेवारीसहित सिंहदरवार प्रवेश गरेकोले सो कुराको मनन गरेर काम गर्न प्रधानमन्त्रीले निर्देशन दिएको परराष्ट्रमन्त्री प्रदीप ज्ञवालीले जानकारी दिए ।

प्रधानमन्त्रीले फजुल खर्च नगर्न र आर्थिक समृद्धिको अभियानलाई मद्दत गर्न मन्त्री र सचिवहरुलाई निर्देशन दिए । ओलीले भ्रष्टाचारविरुद्ध शून्य सहनशीलताको नीतिलाई सरकारले कडाइका साथ कार्यान्वयन गर्ने बताए ।