काठमाडौं, ५ चैत- नक्कली शसस्त्र प्रहरी बनी ठगी गर्ने एक महिलालाई प्रहरीले पक्राउ गरेको छ । सशस्त्र प्रहरी बलको सहायक निरीक्षक हुँ भन्दै पोशाकसमेत लगाएको तस्वीर देखाई ठगी गर्दै आएकी सिन्धुपाल्चोक बलेफी गाउँपालिका- ७ लामो साँघु घर भएकी २७ वर्षीय कोपिला बोहरालाई महानगरीय प्रहरी वृत्त बालाजुको टोलीले आइतबार पक्राउ गरेको हो ।

उनले सशस्त्र प्रहरीमा जागिर लगाइदिन्छु भन्दै विभिन्न महिलालाई ठगी गरेको उजुरी परेपछि प्रहरीले खोजी कार्य अघि बढाएको थियो । खोजीका क्रममा शंका लागेपछि मञ्जु बुढाथोकी नाम बताउने महिलालाई तारकेश्वर नपा- १० लोकतान्त्रिक चोकबाट पक्राउ गरी अनुसन्धान गर्दा तिनै महिला कोपिला बोहरा भएको खुल्न आएको प्रहरीले जनाएको छ ।

उनलाई महानगरीय प्रहरी वृत्त बालाजुमा राखी अनुसन्धान भइरहेको छ ।

उनले दैलेख घर भई बनस्थली बस्ने राधा शाहीसँग १ लाख ४५ हजार, सिन्धुपाल्चोक घर भई कपन बस्ने रेणुका भण्डारीसँग ५० हजार, विमला खड्कासँग १५ हजार, जुनाकुमारी खड्कासँग १२ हजार र मिना सुनुवारसँग १९ हजार ठगेको पाइएको र थप पीडितहरू सम्पर्कमा आउनेक्रम जारी रहेको प्रहरीले जनाएको छ ।