सुनसरी, ११ वैशाख— धरानस्थित पूर्वाञ्चल इन्जिनियरिङ क्याम्पसमा अध्ययनरत दुई विद्यार्थीमाथि सोमबार राति छुरा प्रहार भएको छ । बाग्लुङका सुजन खड्का र काभ्रे धुलिखेलका प्रदिप सापकोटा माथि ३ जनाको समुहले छुरी प्रहार गरेको हो ।

उनीहरु पूर्वाञ्चल इन्जिनियरिङ क्याम्पस धरानमा चौथो वर्षमा अध्यनरत थिए । प्रहरीका अनुसार राति ८ बजे साथीबाट नोटकपी लिएर डेरातर्फ आउदै गरेको बेला खड्का र सापकोटामाथि छुरी प्रहार गरी मोबाइल समेत लुटिएको छ । 

खड्काको हात, छातीमा र सापकोटाको छातीमा चोट लागेको छ । घाइते दुवैको वीपी कोइराला स्वास्थ्य विज्ञान प्रतिष्ठानमा उपचार भइरहेको छ । 

घटनामा संलग्न रहेको आरोपमा मंगलबार विहान प्रहरीले विज्ञान लिम्बुलाई पक्राउ गरेको छ । अन्य दुई जना कुम्बे लिम्बु र विकेन लिम्बु फरार छन् ।