काठमाडौं, ८ जेठ – भारतको राजधानी दिल्लीमा एक कुख्यात ‘चोर’ तौलियाका कारण प्रहरीको नियन्त्रणमा पुगेका छन् । 

पश्चिमी दिल्लीमा प्रहरीले एक कुख्यात चोरलाई पक्रिन जाँदा उसले सूचना पाएर दोस्रो तल्लाबाट भाग्न खोज्यो । प्रहरीले उसलाई नभाग्न चेतावनी दिएपनि उसले हाम्फाल्यो र तल पुग्दा तौलिया नै खुस्कियो । अचम्मको कुरा त, उसले
तौलियाबाहेक केही लगाएकै रहेनछ । अनि प्रहरीले उसलाई च्याप्पै समात्यो ।

वीरेन्द्र उर्फ कालू नामक यो चोरका विरुद्ध ३१ वटा मुद्दा छन् । ऊ त्यो क्षेत्रको घोषित अपराधी हो । उसलाई पक्राउ गर्नका लागि ६ महिना पहिले वारेन्ट पनि जारी भएको थियो तर उसलाई पक्रन सकिएको थिएन । 

पाँच दिनअघि प्रहरीले उक्त चोर आफ्नै घरमा भएको थाहा पायो । अनि इन्द्रपुरी थानाको प्रहरी टोली उसलाई पक्रिन गयो । घरमा तौलिया बेरेर मात्र ऊ बसिरहेको रहेछ । 

प्रहरी आएको थाहा पाउनेबित्तिकै ऊ दोस्रो तल्लामा चढ्यो अनि त्यहाँबाट हाम्फाल्न खोज्यो । चोटपटक लाग्ला भनेर प्रहरीले उसलाई खुबै सम्झाएपनि उसले हाम्फाल्यो । त्यही बेलामा उसको तौलिया खुस्कियो । 

प्रहरीले उसलाई तौलिया लगाऊ भनेर दिएपनि भाग्ने सुरमा उसले लगाएन । पछि उसलाई प्रहरीको गाडीमा लगियो र कपडा लगाइयो ।

एजेन्सी