काठमाडौं – आर्थिक वर्ष २०७४/०७५ को अन्तिम दिन अर्थमन्त्रालय राजस्वको लक्ष्य छुन झण्डै १६ अर्ब संकलन गर्नुपर्ने दबाबमा थियो । सरकारले असार ३१ गते आइतबारसम्ममा कर तथा भन्सारबाट ७ खर्ब १४ अर्ब ३१ करोड ७९ लाख १६ हजार रुपैयाँ आम्दानी गरेको थियो । 

तत्कालीन अर्थमन्त्री कृष्णबहादुर महराले ल्याएको सोे बजेटको राजस्व संकलनको लक्ष्य ७ खर्ब ३० अर्ब रुपैयाँ थियो ।

लक्ष्य पूरा गर्न राजस्व सचिव शिशिरकुमार ढुंगाना दबाबमा थिए । सोही दबाबका कारण सचिव ढुंगाना असार १५ गतेपछि निकै व्यस्त थिए । असार ३१ सम्म राजस्वको लक्ष्य भेट्न नसकेपछि ढुंगानालाई सोमबार एकैदिन १५ अर्ब ७३ करोड ७६ लाख रुपैयाँ कर संकलन गर्नुपर्ने चर्को दबाब थियो ।

त्यसकारण असार अन्तिम दिन सोमबार उनी दिनभरीजसो राजस्वको अपडेट लिनमै व्यस्त रहे । सचिव ढुंगाना सोमबार अबेर (करीब १० बजे) सम्म मन्त्रालयमै रहेर घर फर्केका थिए । 

राजस्व कार्यालयहरूबाट मध्यरातपछि मात्रै राजस्व संकलनको अन्तिम विवरण आएको थियो । आन्तरिक राजस्व विभाग स्रोतकाअनुसार विभागका तथा कर कार्यालयका प्रमुखसँग ढुंगाना सोमबार रातिसम्म निरन्तर सम्पर्कमा रहे । मन्त्रालय तथा विभागका अधिकारीहरूले पनि सोमबार मध्यरातसम्म कार्यालयमै बसेर काम गरेका थिए ।

अर्थमन्त्रालयका अनुसार क्लोजिङको दिन सोमबार भन्सार तथा कर कार्यलयका कर्मचारीको भरपूर प्रयासपश्चात मध्यराति राजस्व संकलनले लक्ष्य नाघेको हिसाब निस्किएको थियो ।

असार अन्तिम दिन ३२ गते कर कार्यालयका प्रमुख तथा भन्सार कार्यालयको अथक प्रयासका कारण राजस्वको लक्ष्य छुन सफल भएको अर्थमन्त्रालयका अधिकारीहरू बताउँछन् ।  

अर्थ मन्त्रालयका प्रवक्ता झक्कप्रसाद आर्चाकाअनुसार राजस्वको लक्ष्य भेट्टाउन सोमबार अन्तिम प्रयासस्वरूप राजस्व नतिरेका ठूला करदातालाई फोन गर्ने लगायत काम गर्दै सबै कर कार्यालय भन्सारका प्रमुखहरूले अथक प्रयास गरेकै कारण एकैदिनमा ठूलो अंकमा राजस्व संकलन भएको हो ।  

आचार्यले भने, ‘राजस्वको पूर्ण लक्ष्य भेट्टाउन सोमबार सम्बन्धित अधिकारीहरुले ठूलो मेहेनत गरे । त्यही मेहनतका कारण एकैदिनमा १६ खर्ब राजस्व संकलन गर्न सफल भयौं ।’