काठमाडौं – ग्लोबल आईएमई बैंक लिमिटेड र आईएमई लाइफ इन्स्योरेन्स कम्पनी लिमिटेडबीच बिहीवार बैंकएस्योरेन्स सम्बन्धी सम्झौतापत्रमा हस्ताक्षर भएको छ ।

सम्झौता पत्रमा हस्ताक्षरपछि ग्लोबल आईएमई बैंक लिमिटेडका १ सय ३१ शाखामार्फत् आईएमई लाइफ इन्स्योरेन्स कम्पनी लिमिटेडको जीवन बीमा योजना खरिद गर्न सकिने छ । बैंकका शाखामा जीवन बीमा सम्बन्धी सम्पूर्ण सेवाहरू छिटो, छरितो एवं भरपर्दो माध्यमबाट प्राप्त गर्न सकिने छ ।

सम्झौता पत्रमा ग्लोबल आईएमई बैंकका प्रमुख कार्यकारी अधिकृत जनक शर्मा पौड्याल र आईएमई लाइफ इन्स्योरेन्स कम्पनी लिमिटेडका सहायक महाप्रबन्धक दिनेश अमात्यले हस्ताक्षर गरेका छन् ।

ग्लोबल आइएमई बैंकले १ सय ३१ शाखा, १५ राजस्व संकलन काउन्टर, १ सय ३४ एटीएम, ५ एक्सटेन्सन काउन्टर तथा १ सय शाखारहित बैंकिङ्ग सेवा र नेपाल बाहिर ३ प्रतिनिधि/सम्पर्क कार्यालयमार्फत् ९ लाखभन्दा बढी ग्राहकलाई सेवा प्रदान गर्दै आइरहेको छ ।

बैंकले अत्याधुनिक प्रविधियुुक्त भाइवर बैंकिङ्ग सेवा, मोबाइल बैंकिङ्ग सेवा, इन्टरनेट बैंकिङ्ग सेवाको साथमा अस्ट्रेलिया, बेलायत र भारतमा प्रतिनिधि/सम्पर्क कार्यालय स्थापना गरेर नेपालीमाझ सेवा प्रदान गर्दै आइरहेको छ । बैंकले मलेसिया, दक्षिण कोरिया, कतार, युएई, बहराइन लगायतका मुलुकबाट रेमिट्यान्स सेवा समेत प्रदान गर्दै आइरहेको छ ।