काठमाडौं। वर्षकै प्रतिक्षित चलचित्र ʻछक्का पञ्जा ३ʼ आजबाट प्रदर्शनमा आएको छ । दशैंमा घटस्थापनाको अवसर पारेर बुधबारबाटै चलचित्र प्रदर्शनमा आएको हो । सिंगल र मल्टिप्लेक्स गरी देशभरका झण्डै १ सय ४५ हलका २ सय पर्दामा चलचित्र प्रदर्शनमा आएका निर्देशक दीपाश्री निरौलाले जानकारी दिईन् ।

दर्शकको उत्साहलाई मध्येनजर गर्दै सोमबार साँझबाटै मल्टिप्लेक्स हलमा चलचित्रको अग्रिम बुकिङ खुला गरिएको थियो । चलचित्रले पहिलो दिन (आज) मल्टिप्लेक्स हलमा मात्रै ५५ शो पाएको छ । आज अधिकाँश मल्टिप्लेक्स हलका शोहरु हाउसफुल छन् । चलचित्रकर्मीहरुले मल्टिप्लेक्समा चलचित्रले पाएको शोलाई ऐतिहासिक भएको बताएका छन् ।

चलचित्रमा दीपकराज गिरी, दीपिका प्रसाईँ, केदार घिमिरे, जितु नेपाल, बुद्धि तामाङ लगायतका कलाकारहरूको अभिनय मुख्य भूमिका छ । प्रियंका कार्की, संजोग कोइराला, वर्षा राउत, स्वस्तिमा खडका, दीपाश्री निरौला अतिथि भूमिकामा देखिएका छन् । चलचित्र ब्यानरको ब्राण्ड, स्टार कलाकार, गीतसंगीत र ट्रेलरका कारण प्रतिक्षित थियो ।