काठमाडौं–महासमिति बैठक नजिकिदैगर्दा नेपाली कांग्रेसमा नयाँ पुस्ताका नेताहरु जुर्मुराउन थालेका छन् । गतबर्ष मंसिरमा सम्पन्न प्रतिनिधिसभा चुनावमा पार्टीको पराजयपछि शीघ्र महासमिति बैठक बोलाउन दवाव सिर्जना गरेका युवा नेताहरु फेरि सक्रिय भएका हुन् ।

संगठनात्मक र विधान संशोधन मार्फत कांग्रेसको पुर्नसरचनाको लागि उनीहरुले समानान्तर प्रस्ताव बहसमा लैजाने तयारी गरेका छन् । कांग्रेसको महासमिति बैठक मंसिर २८ देखि ३० सम्म काठमाडौंमागर्ने तयारी छ । 

महासमिति बैठकमा लैजाने राजनीतिक र विधान संशोधन प्रस्तावको बिषयमा छलफल गर्न कांग्रेसका ८ जना नयाँ पुष्ताका केन्द्रीय सदस्यहरुबीच शुक्रवार पनि छलफल भएको छ । 

भेलामा केन्द्रीय सदस्य गगन थापा, चन्द्र भण्डारी, गुरुराज घिमिरे, धनराज गुरुङ, बद्री पाण्डे, जीवन परियार, रामकृष्ण यादव र कमला पन्त सहभागि छन् । यसअघि बुधवार ६ जना नेताहरुबीच छलफल भएको थियो । 

विक्रम संवत २०१५ सालमा बीपीले ल्याएको अबधारणले बदलिदो समयमा जनताको मन जित्न नसकिने भएकोले नयाँ राजनीतिक सिद्धान्तबारे छलफल गर्ने नेताहरुले बताएका छन् । 
केन्द्रीय सदस्य भण्डारीले राष्ट्रिय मुद्दा सहित छलफल शुरु भएको बताए । 

महासमिति बैठकमा उपसभापति विमलेन्द्र निधिको संयोजकत्वमा रहेको समितिले पेश गर्ने राजनीतिक प्रतिवेदन तथा महामन्त्री पूर्णबहादुर खड्का संयोजकत्वको समितिले पेश गर्ने विधान संशोधन प्रस्तावलाई चुनौती दिनेगरी समानान्त्र प्रतिवेदन ल्याउने युवा नेताहरुको तयारी छ । 

कांग्रेस विधानमा रहेको क्रिर्याशील र सक्रिय सदस्यताको व्यबस्था हटाउने उनीहरुको प्रस्ताव छ । ʻलोकतन्त्रको रक्षा र मुलुकको समृद्धिका लागि कांग्रेसलाई रिभाइज गर्नुपर्छ, आफू नबलिने हो भने कांग्रेसलाई रिभाइज गर्न सकिदैन भन्ने हामीहरुको दवाव होʼ केन्द्रीय सदस्य धनराज गुरुङले लोकान्तरसँग भने ।