विराटनगर – १ नम्बर प्रदेशका मुख्यमन्त्री शेरधन राईले आफू सुटुक्क अमेरिका नगएको बताएका छन् ।

अमेरिकाबाट थाइल्याण्डको राजधानी बैंकक हुँदै नेपाल फर्किएलगत्तै वक्तव्य जारी गर्दै मुख्यमन्त्री राईले आफ्नो अमेरिका भ्रमणलाई जबर्जस्ती विवादमा तानिएको बताएका हुन् ।

विज्ञप्तिको पूर्णपाठ :

२ वर्षदेखि घाँटीको समस्या झेल्दै आएको म उपचारका लागि कात्तिक १६ गते त्रिभुवन अन्तर्राष्ट्रिय विमानस्थलबाट थाइल्याण्डको राजधानी बैंकक गएर कात्तिक २८ गते स्वदेश फर्केको  छु । मेरो स्वास्थ्य लाभको कामना गर्दै तपाईहरू सबैले देखाउनुभएको चिन्ता, चासोप्रति हार्दिक आभार प्रकट गर्दछु ।

मेरो स्वास्थ्य अवस्था र उपचारको बारेमा सामाजिक सञ्जाल, निहित स्वार्थ बोकेका डिजिटल मिडिया र केही छापा माध्यमबाट गरिएका दुष्प्रचारबारे मलाई राम्रोसँग थाहा छ । यसमा मेरोे गम्भिर ध्यानाकर्षण भएको छ । यस्ता आधारहीन र भ्रामक प्रचारबाजीबाट प्रभावित नहुन म सबैलाई हार्दिक आग्रह गर्दछु । 

२ बर्षदेखि घाँटीको पछाडीको भागमा मैले समस्या झेल्दै आएको र निरन्तर नेपालको सरकारी तथा निजी अस्पतालमा र अन्य उपचार पद्दतिहरू समेतबाट उपचार गर्दै आइरहेकोमा खास रोगको पहिचान र समाधान हुन नसकेको कारण चिकित्सकहरूको सल्लाहमा बैंकक गएको हो । विदेशमा उपचार गराउन जानु मेरो कुनै रहर र सोख हैन । मेरो उपचार तथा निजी भ्रमणको सम्बन्धमा मिति २०७५ कात्तिक ११ गते बसेको प्रदेश सरकार  (मन्त्रिपरिषद्) को बैठकबाट निर्णय भई सोही बमोजिम संघीय सरकारलाई जानकारी गराएर म आफू कात्तिक १६ गते बैंककमा उपचारपश्चात् अमेरिका गएको जानकारी गराउँछु ।

थाइल्याण्डको राजधानी बैंककस्थित बुम्रुनग्राड अस्पतालमा मेरो उपचार हुँदा कुनै गम्भीर प्रकृतिको समस्या नदेखिएको र चिकित्सकको सल्लाह बमोजिम कुनै जटिल किसिमको समस्या नरहेको निष्कर्षले मलाई उत्साहित बनाएको छ । चिकित्सहरूको सल्लाह बमोजिम ६ महिना औषधि सेवन गर्नुपर्ने र नियमित फिजियोथेरापीबाटै समस्याको समाधान हुने व्यहोरा समेत जानकारी गराउँछु । साथै ६ महिनापछि अर्थात् २०७६ बैशाख ६ गते पुनः जाँचको लागि बोलाएको कुरा जानकारी गराउँछु । 

प्रदेश सरकारको प्रमुख भएको नाताले निजी काम र भ्रमणमा जाँदा वा औपचारिक भ्रमणमा जाँदा अपनाउनुपर्ने प्रक्रिया र लिनुपर्ने निर्णय, अनुमति वा जानकारीको सम्बन्धमा मलाई अवगत भएकै कारणले मैले प्रक्रिया पूरा गरेर मात्र भ्रमण गरेको समेत जानकारी गराउँछु । बैंककमा उपचारको क्रममा मेरो अन्तिम रिपोर्ट नोभेम्बर १२ अर्थात् कात्तिक २६ मा मात्र प्राप्त हुने भएको हुँदा पूर्वनिर्णय अनुसार उक्त बाँकी अवधिको लागि अमेरिका गएको हुँ । म सुटुक्क होइन, विधिसम्मत सबै प्रक्रिया पूरा गरेर प्रेसलाई समेत जानकारी गराई म अमेरिका गएको कुरा राख्न चाहन्छु । मेरो व्यक्तिगत उपचारको सिलसिला र निजी भ्रमण भएको हुनाले आफूले कुटनैतिक राहदानी (रातो पासपोर्ट) समेतको प्रयोग नगरेको कुरा अवगत गराउन चाहन्छु ।

अमेरिकाको मेरो भ्रमण कसैको औपचारिक निम्तो, कार्यक्रम र प्रायोजनमा नभई निजी एवं पारिवारिक भेटघाट मात्र भएको जानकारी गराउँदछु । मेरो आग्रहमा होइन, न्युयोर्कस्थित प्रवासी नेपाली मञ्च र आदिवासी जनजाति महासंघको संयुक्त आग्रहमा आयोजित एक भेलामा सहभागी भई वाल्टिमोर, वाशिंटन डिसी, वफेल्लो लगायतका केही ठाउँहरूको भ्रमणपश्चात् पुनः बैकक भएर आफ्नो उपचारको सम्पूर्ण रिपोर्टसहित स्वदेश फर्किएर म आफ्नो जिम्मेवारीमा क्रियाशील भइसकेको जानकारी गराउन चाहन्छु ।

यसप्रकार भएको मेरो अमेरिका भ्रमणलाई जबर्जस्त विवादमा तान्न खोजेर मलाई केही थाहा नभएको, कोही नभेटेको र नचिनेको व्यक्तिहरूको एउटा घटनामा म र मेरो सहयोगी पारुहाङ राईको नाम जोडेर सनसनीपूर्ण बनाएर गरिएको भ्रमपूर्ण प्रचारबाजीको खण्डन गर्दछु । यसमा मेरो कुनै संलग्नता नरहेको जानकारी गराउँदछु ।

मैले नैतिक मूल्यमान्यता, इमान, पारदर्शीता, त्याग र निष्ठाको राजनीति गर्दै आइरहको छु  । मेरो उपचार र भ्रमणको सम्पूर्ण खर्च मैले आफ्नै पारिश्रामिकबाट जम्मा भएको स्रोतबाट गरेको छु । मेरो उपचार र भ्रमणका लागि कुनै व्यक्ति वा संस्था कसैबाट कुनै प्रकारको सहयोग नलिएको जानकारी गराउँदछु । 

अन्त्यमा यस्ता कुत्सित र पूर्वाग्रहले भरिएका हल्ला र प्रचारबाजीहरूबाट म कति पनि प्रभावित भएको छैन । बरु आफ्नो इमान, नैतिक मूल्यमान्यता, निष्ठा र त्यागको जगमा दरिलो उभिँदै निरन्तर अगाडि बढ्न मलाई उर्जा मिलेको छ । मेरो स्वास्थ्यप्रति चासो लिएर सद्भाव देखाउँदै स्वास्थ्य लाभको कामना गर्नुहुने स्वदेश तथा विदेशमा रहनुभएका सम्पूर्ण नेपाली दाजुभाई तथा दिदीबहिनीहरूमा हार्दिक धन्यवाद ज्ञापन गर्दछु ।