सुर्खेत – नेपाल कम्यूनिस्ट पार्टी (नेकपा) गठन भएको १ वर्ष पुग्नै लाग्दा कर्णालीमा शनिबार पहिलो बैठक बसेको छ ।

कर्णालीकै सबैभन्दा महंगो मानिने सिद्धार्थ होटलमा १ सय ७५ सदस्यीय प्रदेश कमिटी, स्थायी कमिटी सदस्य, केन्द्रीय सदस्य लगायत २ सयभन्दा बढीको सहभागितामा बैठक भइरहेको छ ।

कम्यूनिस्ट पार्टीको पहिलो बैठक प्रतिष्ठित होटलमा गरिनु लज्जास्पद भएको नेकपाकै कार्यकर्ताको भनाई छ । नेकपाका एक नेताले नाम नखुलाउने शर्तमा भने, ‘हामीले देशको समृद्धि खोजेका हौं, पार्टीमा समृद्धि आएछ । पार्टीका बैठक ठूला होटलमा आयोजना गरिनु भनेको पार्टीको समृद्धिको रुपमा हामीले बुझ्नुपर्छ ।’ उनले सर्वहारा वर्गको पार्टी भनेर भनिएपनि दिनप्रतिदिन पार्टी विलासितावादीको चंगुलमा फस्दै गएको आरोप लगाए ।

सिद्धार्थ होटलमा मम प्रतिप्लेट १ सय ८० रुपैयाँ पर्छ । हल भाडा प्रतिदिन २० हजार रुपैयाँ लिइन्छ । प्रदेश कमिटीको पहिलो बैठकमा चिया, पानी, कोठाभाडा गरेर लाखौं रुपैयाँ खर्च हुने अनुमान गरिएको छ ।

नेकपा कर्णाली प्रदेश कमिटीको पहिलो बैठक सुर्खेतमा शुरू भएको छ । पार्टी केन्द्रीय सचिवालयले प्रदेश कमिटीको टुंगो लगाएलगत्तै कर्णाली प्रदेश कमिटीको पहिलो बैठक शनिवार बसेको हो । १ सय ७५ सदस्य रहेको कर्णाली प्रदेश कमिटीमा पूर्वमाओवादीबाट ८८ र पूर्वएमालेबाट ८७ जना सदस्य रहेका छन् ।

पहिलो बैठकमा प्रदेशका केन्दीय सदस्य पनि सहभागी भएका छन् । अधिकांश केन्द्रीय सदस्य प्रदेश कमिटीको बैठकमा पुगेको केन्द्रीय सदस्य विष्णु रिजालले बताए । 

सहइन्चार्ज अनुपस्थित

पार्टीको प्रदेश कमिटीको पहिलो बैठकमा पार्टीका सहइन्चार्ज यामलाल कँडेल भने सहभागी भएनन् । यसअघि विभिन्न मिडियामा उनी असन्तुष्ट भएको समाचार सार्वजनिक भएपनि लोकान्तरसँग कुरा गर्दा आफू व्यावहारिक समस्याका कारण बैठकमा उपस्थित हुन नसकेको बताए ।