बुटवल- प्रदेश नम्बर पाँचमा क्षयरोगको अवस्था डरलाग्दो रूपमा देखिएको छ । क्षयरोगको कारणबाट प्रदेश पाँचमा पछिल्लो ६ महिनाको अवधिमा २ सय ३७ जनाको मृत्यु भएको छ ।

धेरै क्षयरोगी खुल्न नचाहँदा यति नै क्षयरोगी छन भन्ने यकिन तथ्याङक स्वाथ्य निर्देशनालय प्रदेश नम्बर ५ सँग छैन । क्षयरोगबाट सबैभन्दा धेरै कपिलवस्तुका बिरामीको मृत्यु भएको छ ।

कपिलवस्तुका ४३ जना क्षयरोगका बिरामीले ज्यान गुमाएका छन् । दाङमा ४०, बाँकेमा ३३, बर्दियामा २३, गुल्मीमा २१, रोल्पामा १५, प्युठानमा ११, पाल्पामा १६, अर्घाखाँचीमा १२, रुपन्देहीमा १२ र नवलपरासीमा १३ जना क्षयरोगीको मृत्यु भएको छ । निर्देशनालयका निर्देशक दीप कुमार चापागाईले प्रदेश पाँचमा ७ हजार २९ जना बिरामी पत्ता लागेको बताए । 

नेपालमा क्षयरोगका बिरामी उपचार सफलताको दर ९१ प्रतिशत रहेतापनि उपचारकै पहुँचमा नआउने र बीचमै विभिन्न कारणले औषधि सेवन नगर्दा बिरामीको संख्या बढ्ने गरेको बताइन्छ । 

निर्देशनालयले दिएको जानकारीअनुसार प्रदेश ५ मा ६ सय ९० क्षयरोगको उपचार केन्द्र, १ सय १५ प्रयोगशाला र ११ वटा जीन एक्सपर्ट केन्द्रबाट क्षयरोगको उपचार तथा निदान सेवा प्रदान गरिँदै आएको छ । उपचारको पहुँचमा नआउने र निजी स्वास्थ्य संस्थाबाट बिरामीले उपचार गर्ने गरेका कारण पनि उपचारमा नियमितता नहुने र समस्या आउने गरेको बताइन्छ ।