काठमाडौं – गत वैशाख १६ गतेदेखि शुरू भएको संघीय संसदको चौथो अधिवेशन बिहीवार राति १२ बजेदेखि स्वतः अन्त्य हुने गरेर स्थगित भएको छ ।

१ सय ४४ दिन चालू रहेको संसदको वर्षे अधिवेशनमा ६० दिनमा ६५ पटक बैठक बसेको थियो । बैठक १ सय ९३ घण्टा ४० मिनेट बसेको सभामुख कृष्णबहादुर महराले जानकारी दिए । 

अधिवेशन अवधिभर प्रतिनिधि सभामा जम्मा १७ वटा सरकारी विधेयक दर्ता भएकोमा ७ वटा विधेयकहरू संघीय संसदको दुवै सदनबाट पारित भइसकेको छ भने ५ वटा विधेयक सभामा प्रस्तुत हुन बाँकी रहेको छ । 

४ वटा विधेयक सम्बन्धित समितिहरूमा विचाराधीन छन् र राजश्व चुहावट (अनुसन्धान तथा नियन्त्रण) (पहिलो संशोधन) विधेयक, २०७५ प्रतिनिधि सभाबाट पारित भई राष्ट्रिय सभामा पठाइसकिएको छ । 

सभाको दोस्रो र तेस्रो अधिवेशनमा दर्ता भएका विभिन्न १९ वटा विधेयक मध्ये ८ वटा विधेयक दुवै सदनबाट पारित भइसकेको छ भने ६ वटा विधेयक समितिमा विचाराधीन अवस्थामा नै रहेको छ, औद्योगिक व्यवसाय विकास प्रतिष्ठान (पहिलो संशोधन) विधेयक, २०७५ प्रतिनिधि सभाबाट पारित भई राष्ट्रिय सभामा पठाइसकिएको छ । 

थप ३ वटा विधेयक सभामा प्रस्तुत हुन बाँकी रहेको छ । साथै राष्ट्रपतिबाट आएको सन्देश सहित प्राप्त भएको 'राहदानी विधेयक, २०७५' संघीय संसदको दुवै सदनबाट संशोधन सहित पारित भएको छ ।

त्यसैगरी राष्ट्रिय सभामा उत्पत्ति भई प्रतिनिधि सभाको दोस्रो, तेस्रो र यस अधिवेशनमा प्राप्त भएको विभिन्न ७ वटा विधेयकहरू मध्ये २ वटा विधेयक सभाबाट पारित भइसकेको छ भने ५ वटा विधेयकहरू सम्बन्धित समितिमा विचाराधीन रहेको छ । यसरी यस अधिवेशनमा संघीय संसदबाट कूल १८ वटा विधेयकहरू पारित भएको जानकारी सभामुख महराले दिए ।