काठमाडौं-साफ यू–१८ च्याम्पियनसिप फुटबलको पहिलो खेलमा घरेलु टोली नेपालले माल्दिभ्ससँग १–१ गोलको बराबरी खलेको छ । 

समूह ‘ए’ मा रहेको साविक विजेता नेपालले हलचोक मैदानमा सुरुमै गोल खाएको थियो । खेल शुरु भएको १३ औं मिनेटमा पेनाल्टीमार्फत माल्दिभ्सले गोल गरेको थियो । डिबक्स एरिया भित्र माल्दिभ्सका कप्तान हसन नाजिमलाई नेपालका रोशन दोङले फल गरेपछि माल्दिभ्सले पेनाल्टी पाएको थियो । उक्त पेनाल्टीलाई नजिम आफैंले गोलमा परिणत गरेका थिए ।

एक गोलले पछि परेको नेपालले पहिलो हाफमा कुनै पनि गोल गर्न सकेन ।  दोश्रो हाफको ७५ औं मिनेटमा नेपालका मनिष डाँगीले उत्कृष्ट हेड गोल गर्दै खेल बराबरीमा ल्याएका थिए ।

उनले बिर्जेस चौधरीको क्रस सदुपयोग गरेर उत्कृष्ट गोल गरेका थिए । दोस्रो हाफमा नेपालले आधा दर्जन गोलको अवसर सृजना गरेको थियो।

५३ औं मिनेटमा बिर्जेस चौधरीको प्रहार क्रसबार नजिकैबाट बाहिरिएको थियो । ६३ औं मिनेटमा कप्तान जय गुरुङको प्रहार माल्दिभ्सका गोलरक्षकले उत्कृष्ट बचाउ गरेका थिए । 
७१ औं मिनेटमा नितिन थापाको प्रहार पोलमा लागेर फर्कियो । दोश्रो हाफमा माल्दिभ्सको प्रदर्शन भने सम्झन योग्य थिएन । 

समूह ‘ए’मा नेपाल र माल्भिभ्ससँगै भुटान पनि छ । नेपालले भुटानसँग आइतबार प्रतिस्पर्धा गर्नेछ । सेमिफाइनलमा पुग्नका लागि नेपाललाई भुटानसँगको खेल जित्नैपर्ने भएको छ ।

नेपाली टोली यसअघिका दुवै संस्करणको विजेता हो । शनिबार समूह ‘बी’ अन्तर्गत बंगलादेश र श्रीलंकाबीच प्रतिस्पर्धा हुनेछ ।