काठमाडौँ -राष्ट्रिय जनता पार्टी (राजपा)मा महन्थ ठाकुर पुनः अध्यक्षमण्डलको संयोजक बनेका छन् ।

यस अघिका संयोजक राजकिशोर यादवको अध्यक्षतामा सोमवार बसेको अध्यक्षमण्डलको बैठकले ठाकुरलाई संयोजक बनाउने निर्णय गरेको हो ।

एकताको महाधिवेशन नहुनेबेलासम्म आलोपालो पार्टीको नेतृत्व गर्ने विधानमा भएको व्यवस्था अनुसार ठाकुर दोस्रोपटक अध्यक्षमण्डलको संयोजक तोकिएका हुन् ।

राजपामा संयोजकको कार्यकाल २ महिनाको हुने व्यवस्था छ ।

मधेशकेन्द्रित ६ वटा पार्टी मिलेर बनेको राजपामा एकतापछि एक वर्षसम्म ठाकुर नै संयोजक रहेका थिए । त्यसपछि उनले राजेन्द्र महतोलाई संयोजकको पद हस्तान्तरण गरे । त्यस यता प्रत्येक दुईमहिनामा संयोजक फेरिएका छन् ।